निफको आठौँ संस्करण चैत ७ गतेदेखि काठमाडौँमा हुने
सुशासन नेपाल
काठमाडौँ – नेपाल अन्तर्राष्ट्रिय फिल्म महोत्सव (निफ) को आठौँ संस्करण यही चैत ७ गतेदेखि ११ गतेसम्म काठमाडौँमा आयोजना हुने भएको छ। नेपाल फिल्म तथा सांस्कृतिक प्रतिष्ठानको आयोजनामा हुने महोत्सवमा ४० देशका ८७ वटा फिल्म छनोट भएको महोत्सव अध्यक्ष केपी पाठकले जानकारी दिए।
‘विश्वभरिका कथाहरुको उत्सव, नेपाल अन्तरराष्ट्रिय फिल्म महोत्सव’ नाराका साथ आयोजना हुने आठौँ संस्करणमा फिल्म प्रदर्शनीसँगै कार्यशाला, अन्तरक्रियालगायतका कार्यक्रम हुने अध्यक्ष पाठकले बताए। उनले भने, ‘यस अगाडिका शृंखलाभन्दा भव्य बनाउने किसिमले हामीले तयारी गरेका छौँ । फिल्मप्रेमी दर्शक आकर्षित हुनेगरी हामीले प्राप्तमध्येबाट फिल्म छनोट गरेका छौँ । यो विश्वभरका फिल्मकर्मी भेटघाट, छलफल र फिल्म आदानप्रदान गर्ने माध्यम बन्नेमा विश्वस्त छौँ।’
उनले महोत्सवअन्तर्गत तेस्रो दिन शनिबार ‘रसियन फिल्म डे’ को आयोजना गरिने जानकारी दिए। उक्त दिन तीन वटा रसियन फिल्म प्रदर्शन गरिने छ। महोत्सवलाई राष्ट्रिय र अन्तरराष्ट्रिय गरेर दुई किसिमले वर्गीकरण गरिएको छ । दुवैमा ‘फिचर’ र लघु फिल्मका साथै वृत्तचित्र विधामा अवार्ड वितरण गरिने छ ।
नेपाली कथानक फिल्मको प्रतिस्पर्धा हुने ‘नेसनल पानोरमा’मा जोन योञ्जनले निर्देशन गर्नुभएको ‘क्रलिङ क्रोज’, दिनेश राउतले निर्देशन गरेको ‘पूजार सार्की’, सिद्धार्थ पुडासैनीले निर्देशन गरेको ‘सानो संसार’ र लक्ष्मण सुवेदीले निर्देशन गरेको ‘सतीदेवी’ छनोट भएका छन् ।
नेपाली वृत्तचित्रको प्रतिस्पर्धा विधामा सुविना श्रेष्ठको ‘देवी’, रजिला श्रेष्ठको ‘छेसाङ’, गौरव आयरको ‘मुक्ति’, तासी लाजोमको ‘नो मोनास्ट्री नो भिलेज’, दीपा श्रेष्ठको ‘उड्ने सपना’ र लव प्याकुरेलको ‘गल्र्स रिराइटिङ डेस्टिनी’ रहेको छ। यस संस्करणदेखि एआई प्रविधिबाट वा सोसम्बन्धी विषयमा बनेको फिल्मको प्रतिस्पर्धा पनि थप गरिएको महोत्सव निर्देशक पाठकले जानकारी दिए।
‘एआई फिल्म्स’ नाम दिइएको यो विधामा चीनको ‘एभ्री हेजिस्टेसन अफ योर्स क्यान डिस्ट्रोय दी वल्र्ड’, अर्जेन्टिनाको ‘दी एबिस’, फ्रान्सको ‘गोल्ड कास्टिङ’, पेरूको ‘दी ड्रिम, दी फग एन्ड दी रेन’ र अमेरिकाको ‘मब पार्ट १’ रहेको छ।
महोत्सवमा अन्तर्राष्ट्रिय प्रतिस्पर्धाअन्तर्गत सर्वोत्कृष्ट हुने फिल्मलाई एक हजार पाँचसय अमेरिकी डलर राशिसहित ‘गौतम बुद्ध अवार्ड’ प्रदान गरिनेछ । त्यस्सै, राष्ट्रिय तथा अन्तर्राष्ट्रिय फिल्मबाट कुनै एक फिल्मलाई ‘अन्तर्राष्ट्रिय फिल्म समाज महासंघ’ को तर्फबाट ‘डन कि होते’ शीर्षकमा पुरस्कार प्रदान गरिनेछ ।
नेपाली प्रतिस्पर्धाअन्तर्गत उत्कृष्ट फिल्मलाई रु एक लाख र ट्रफी, उत्कृष्ट छोटो फिल्म र उत्कृष्ट वृत्तचित्रलाई रू ५०र५० हजार र ट्रफी प्रदान गरिनेछ । महोत्सवमा सर्वोत्कृष्ट अन्तरराष्ट्रिय वृत्तचित्रलाई एक हजार डलर राशिको ‘माउन्ट एभरेस्ट अवार्ड’ र सर्वोत्कृष्ट अन्तर्राष्ट्रिय लघुफिल्मलाई पाँच सय डलरको ‘बागमती अवार्ड’ प्रदान गरिनेछ। एआई प्रविधिको फिल्मलाई पाँच सय अमेरिकी डलरको ‘मञ्जुश्री अवार्ड’ प्रदान गरिने आयोजकले जनाएको छ।
