क्लाउडिया गोल्डिनलाई अर्थशास्त्रतर्फको नोबेल पुरस्कार
सुशासन नेपाल
काठमाडौँ । यस वर्षको अर्थशास्त्रतर्फको नोबेल पुरस्कार अमेरिकी आर्थिक इतिहासकार तथा श्रम अर्थशास्त्री क्लाउडिया गोल्डिनलाई दिइने भएको छ । सोमबार रोयल स्विडिस एकेडेमेली एक कार्यक्रमबीच अर्थशास्त्री गोल्डिनलाई विजेता घोषणा गरेको हो । ‘महिला श्रम बजारका परिणामबारे हाम्रो बुझाइलाई परिष्कृत’ गरेकोमा गोल्डिनलाई नोबेल अर्थशास्त्र पुरस्कार दिने घोषणा गरिएको एकेडेमीले जनाएको छ ।
गोल्डिनले सदियौँदेखि श्रम बजारमा महिलाको सहभागिता र कमाइबारे अनुसन्धान गरेको एकेडेमीले जनाएको छ । उनले अनुसन्धानले परिर्वतनको कारण र लैंगिक अन्तरको मुख्य स्रोत पनि पत्ता लगाएको एकेडेमीको भनाइ छ । विश्व श्रम बजारमा महिलाहरूको कम प्रतिनिधित्व र थोरै आम्दानीबारे पनि अर्थशास्त्री गोल्डिनले २०० वर्षदेखिको तथ्यांक संकलन गर्दै लैंगिक अन्तर र रोजगारी दरमा आएको परिवर्तनलाई प्रस्तुत गरेकी छिन् ।
अर्थशास्त्रतर्फको नोबेल विजेताले १ करोड १० लाख स्विडिस क्रोनर(९ लाख ९७ हजार अमेरिकी डलर) र पदक प्राप्त गर्नेछन् । यस वर्षबाट पुरस्कार राशिमा १० लाख स्विडिस क्रोनर बढाइएको हो ।
गत वर्ष बैंक तथा वित्तीय संकटबारे अध्ययन गरेका तीन जना अर्थशास्त्रीहरूलाई नोबेल पुरस्कार दिइएको थियो । १९८० को दशकको सुरुदेखि नै संकटको समयमा बैंकहरूलाई कसरी कम जोखिमयुक्त बनाउने, बैंक विघटनले वित्तीय संकटलाई कसरी बढावा दिन्छ भन्ने विषयमा अनुसन्धान गर्दै आएका बेन बेर्नान्के, डग्लस डब्लु डायमन्ड र फिलिप्स एच डिब्भिगलाई अर्थशास्त्रतर्फको नोबेल पुरस्कार दिइएको हो ।
यस वर्षको सबै नोबेल विजेता घोषणा भइसकेको छ । यस वर्ष नर्वेली लेखक योन फसले साहित्यतर्फ र इरानी मानवअधिकारकर्मी नरगिस मोहम्मदीले नोबेल शान्ति पुरस्कार पाएकी छिन् । त्यस्तै प्रकाशको अध्ययन गर्ने तीन वैज्ञानिकलाई भौतिकशास्त्र, ‘क्वान्टम डट्स’ खोजी गर्ने तीन जना वैज्ञानिकलाई रसायनशास्त्र र कोरोना खोप विकासमा संलग्न २ वैज्ञानिकलाई नोबेल चिकित्सा पुरस्कार प्रदान गरिएको छ ।
