निर्वाचनमा कुनै पनि पार्टीसँग गठबन्धन गर्नुहुँदैन: महामन्त्री थापा
सुशासन नेपाल
काभ्रे । नेपाली कांग्रेसका महामन्त्री गगन थापाले निर्वाचनमा कुनै पनि पार्टीसँग गठबन्धन गर्नुहुँदैन भन्ने पक्षमा आफू रहेको बताएका छन् । ५ वर्षका लागि जनतासँगै मौका माग्ने भन्दै थापाले नेपाललाई मान्छे बेच्नेको देशबाट सामान बेच्नेको देश बनाउने बताए । उनले ‘हामी यहाँ छौं’ भन्नेलाई कांग्रेसले उद्धार गरेको बताएका छन् ।
नेपाल कम्युनिष्ट पार्टीलाई गाडीको संज्ञा दिँदै उनले आन्तरिक झगडाका कारण गन्तव्यमै नपुगी गाडी दुर्घटना गराएपछि भिरपाखामा ‘हामी यहाँ छौं’ भनेर कराइरहेकाहरूलाई कांग्रेसले उद्धार गरेको बताए । नेपाली कांग्रेस बनेपा नगर समितिले आयोजना गरेको पार्टी प्रवेश तथा बधाई कार्यक्रमलाई सम्बोधन गर्दै महामन्त्री थापाले कम्युनिष्ट पार्टीले भ्रमको व्यापार गरिरहेकोसमेत आरोप समेत लगाए । थापाले कम्युनिष्ट पार्टीमा दोहारो चरित्र देखिएको उनको भनाई थियो ।
सरकारमा र प्रतिपक्षमा रहँदा एउटै विषयमा देखिएको फरक–फरक भूमिका र सरकारमै रहेर देखाएको दोहोरो चरित्रले भ्रम र भयको व्यापार गरिरहेको स्पष्ट हुने महामन्त्री थापाको तर्क छ । आगामी निर्वाचनमा उनीहरूको दोकान कांग्रेसले बन्द गर्ने उनको दाबी छ ।
