सरकार संसद् छलेर अध्यादेश ल्याउने बाटोमा लागेको माओवादीको आरोप
सुशासन नेपाल
काठमाडौँ – प्रमुख प्रतिपक्षी दल नेकपा माओवादी केन्द्रले सरकार संसद् छलेर अध्यादेश ल्याउने बाटोमा लागेको आरोप लगाएको छ। शुक्रबार पार्टी कार्यालय पेरिसडाँडामा बसेको स्थायी समितिको बैठकपछि पत्रकारहरूसँग कुराकानी गर्दै उपाध्यक्ष तथा प्रवक्ता अग्निप्रसाद सापकोटाले हिउँदे अधिवेशन बोलाउन छोडेर अध्यादेश ल्याएर दल विभाजन गर्ने खेलमा सरकार लागेको आरोप लगाएका हुन्। प्रवक्ता सापकोटाले सरकारको नियत ठीक नभएको पनि बताए।
‘संसद् अधिवेशन बोलाउन धेरै नै ढिला भएको छ। म सभामुख हुँदा समयमै अधिवेशन बोलाउने गरेको थिएँ। अहिले १९ पुस भइसक्यो सर्वथा बेठीक कुरा भइराखेको छ। सरकारको नियत राम्रो देखिएको छैन,’ उनले भने, ‘सदन छलेर अध्यादेश ल्याउने बाटोमा सरकार गइरहेको छ।’
सापकोटाका अनुसार, बैठकमा ३० जना स्थायी समिति सदस्यहरूले अध्यक्ष पुष्पकमल दाहाल प्रचण्डले मौखिक रूपमा राखेको राजनीतिक प्रतिवेदनमाथि धारणा राखेका छन्। उनीहरूले समसामायिक परिस्थिति, पार्टी रुपान्तरण, संविधान संशोधनलगायतका विषयमा धारणा राखेको सापकोटाले बताए। उनका अनुसार स्थायी समिति बैठक शनिबार पनि बस्नेछ।
