आवश्यकताले खोजी भए दलीय राजनीतिमा फर्किने पूर्वराष्ट्रपति भण्डारीको संकेत
सुशासन नेपाल
विराटनगर – पूर्वराष्ट्रपति विद्यादेवी भण्डारीले राष्ट्रको आवश्यकताले खोजी भए दलीय राजनीतिमा फर्किने बताएकी छन्। श्री जनता माध्यमिक विद्यालय, इटहरीको वार्षिकोत्सवमा सहभागी हुन जाने क्रममा सोमबार भण्डारीले विराटनगरमा सञ्चारकर्मीहरूसँग आवश्यकताले खोजी भए दलीय राजनीतिमा फर्किने तर अहिले नै कुनै दलमा आवद्ध हुने निर्णयमा आफू नपुगेको बताइन्।
शिक्षा, स्वास्थ्य, खानेपानी, जलवायु परिवर्नत, वैदेशिक रोजगारीमा जानुपर्ने युवाको बाध्यताजस्ता समस्या समाधानका लागि आफूले छलफल चलाइरहेको बताउँदै भण्डारीले यस्ता एजेन्डा पूरा गर्न कुनै दलमा आवद्ध हुनुपर्यो भने त्यतिबेला नै निर्णय लिने बताइन्।
उनले भनिन्, ‘राष्ट्रपति पद गैरराजनीतिक पद होइन। राष्ट्रिय राजनीतिमा सक्रिय नै छु। राष्ट्रिय राजनीतिका समग्र एजेन्डामा सबै पक्षहरूसँग छलफल गरिरहेको छु, चलाइरहेको छु। ती एजेन्डा पूरा गर्न कुनै दलमा आवद्ध हुनुपर्यो भने त्यतिबेला निर्णय गर्नेछु।’
दलीय राजनीतिकमा सक्रिय हुने अवस्थामा नेकपा एमालेमै जानुपर्ने पनि उनले बताइन्। एमालेको भावी अध्यक्षको भूमिका आउन चाहनुभएको हो भन्ने सञ्चारकर्मीको प्रश्नको उत्तरमा भण्डारीले भनिन्, ‘एमालेबाटै जन्मेर हुर्केर आएको हुनाले त्यही जानुपर्ने हुन्छ तर अहिले छलफल भएको छैन।’
