प्रधानमन्त्रीद्वारा शिक्षकका मागबारे सम्बन्धित मन्त्री र सचिवहरुसँग छलफल
सुशासन नेपाल
काठमाडौँ – आन्दोलनरत शिक्षकका मागबारे प्रधानमन्त्री केपी शर्मा ओलीले मन्त्री र सचिवहरूसँग छलफल गरेका छन् । प्रधानमन्त्री ओलीले आन्दोलनरत शिक्षकका मागबारे उपप्रधान तथा अर्थमन्त्री, गृहमन्त्री र शिक्षामन्त्री र ती मन्त्रालयका सचिवहरूसँग छलफल गरेका हुन् ।
प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार भएको बैठकमा उपप्रधानमन्त्री एवं अर्थमन्त्री विष्णुप्रसाद पौडेल, गृहमन्त्री रमेश लेखक, शिक्षा, विज्ञान तथा प्रविधिमन्त्री विद्या भट्टराई, मुख्यसचिव एकनारायण अर्याल र सम्बन्धित मन्त्रालयका सचिवसँगको छलफल भएको थियो ।
शिक्षकका मागबारे थप गृहकार्य गरी वार्ताबाट समस्याको समाधान गर्नुपर्ने बैठकको निष्कर्ष रहेको प्रधानमन्त्रीको सचिवालयले जानकारी दिएको छ ।
छलफलमा शिक्षा मन्त्रालयका तर्फबाट नेपाल शिक्षक महासंघको आह्वानमा काठमाडौंमा जारी आन्दोलनमा उठाइएका मागबारे अवगत गराइएको थियो । बैठकमा विद्यमान आर्थिक अवस्था, विद्यालय शिक्षाको कानुन निर्माणको प्रक्रिया र सरकारले तत्काल पूरा गर्नसक्ने माग र गुणस्तरीय शिक्षाको सुनिश्चितता आदि विषयमा छलफल भएको प्रधानमन्त्रीको सचिवालयले जानकारी दिएको छ ।
