कस्तो छ राजनीतिमा युवा चासो ?
सुशासन नेपाल
काठमाडौँ । ५० प्रतिशत युवाले मात्रै आफूलाई राजनीतिक रूपमा सचेत रहेको सोच्ने गरेको अध्ययनले देखाएको छ । तीमध्ये ६१ प्रतिशत पुरुष र २८ प्रतिशत महिला छन् । नेपाल इन्स्टिच्युट फर पोलिसी रिसर्चले गरेको अध्ययनले यस्तो तथ्य औँल्याएको हो ।
देशका एक हजार ८० युवामा गरिएको अध्ययनले १३ प्रतिशत युवाले आफू राजनीतिमा सक्रिय रूपमा संलग्न भएको बताएका थिए ।
त्यस्तै ४३ प्रतिशत युवा दलका नेता र दलले जनताको अपेक्षाको प्रतिनिधित्व गर्छन् भन्नेमा सहमत देखिएका छन् भने ८४ प्रतिशत राजनीतिक दलका नेताहरू आफ्नो स्वार्थका लागि चिन्तित रहने गरेकोमा सहमत भएका छन् ।
अध्ययनले ७५ प्रतिशत युवाले राजनीतिक दलहरूले पूर्वाधारका क्षेत्रलाई प्रमुख प्राथमिकता दिनुपर्ने धारणा व्यक्त गरेको देखाएको छ भने ७४ प्रतिशत युवाले हार्ने भए पनि नयाँ उम्मेदवारलाई मतदान गर्ने कुरामा सहमत रहेको देखाएको छ ।
चुनावी प्रतिस्पर्धामा ३१.३३ प्रतिशत युवा उम्मेदवार
आसन्न निर्वाचनमा प्रतिनिधिसभाका १६५ र प्रदेशसभाका ३३० सिटमा देशभरबाट पाँच हजार ६३६ जना उम्मेदवार छन् । तीमध्ये ४० वर्ष र सोभन्दा मुनिका युवा उम्मेदवारहरूको संख्या एक हजार ७६६ अर्थात् ३१.३३ प्रतिशत छ । तर, देशभर बलियो संगठन भएका प्रमुख दलहरूले भने युवालाई उम्मेदवार बनाएका छैनन् । ठूला दलले युवालाई उम्मेदवार नबनाएका कारण अधिकांश ठाउँमा युवा उम्मेदवारहरू मुख्य प्रतिस्पर्धामा आउने सम्भावना छैन ।
जसकारण उम्मेदवारीको ३१ प्रतिशत युवा भए पनि प्रतिनिधिसभा र प्रदेशसभामा भने युवाको संख्या न्यून हुने निश्चित छ । पाँच महिनाअघि भएको स्थानीय तह निर्वाचनबाट निर्वाचितमध्ये ४० प्रतिशत युवा छन् । तर, संसद्मा भने त्यतिकै संख्यामा युवा प्रतिनिधित्व हुने गरेको छैन ।
त्यसो त यसपटक प्रतिनिधिसभा र प्रदेशसभामा परेको युवा उम्मेदवारी विगतभन्दा कमजोर हो । ०७४ को निर्वाचनमा ५ हजार १९० ले उम्मेदवारी दिएकोमा एक हजार ८०९ अर्थात् ३४.८५ प्रतिशत युवा थिए । यसपटक पाँच वर्ष अघिको भन्दा कम उम्मेदवारी परेको हो ।
