प्रधानमन्त्रीमा दावी पेश गर्न प्रचण्ड राष्ट्रपति निवासमा
सुशासन नेपाल
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्रीमा समर्थन गरेको पत्र लिएर दलहरू राष्ट्रपति निवास शीतल निवास पुग्दैछन् ।
राष्ट्रपति विद्यादेवी भण्डारीले दलहरूलाई आज पाँच बजेसम्म बहुमत पुर्याएर आउन समय दिएकी थिइन् । सो समयभित्र नै दलहरू प्रचण्डलाई समर्थन गरेको पत्र लिएर जान लागेका हुन् ।
७८ सिट भएको एमाले, ३२ सिटको माओवादी, २० सिटको राष्ट्रिय स्वतन्त्र पार्टी, ६ सिट भएको जनमत पार्टी तथा स्वतन्त्र सांसद र नागरिक उन्मुक्ति पार्टीको समेत सहमति जुटाएर प्रचण्ड प्रधानमन्त्रीमा दाबी गर्न शीतल निवास जाँदैछन् ।
वर्तमान सत्ता गठबन्धन भत्किएर नयाँ गठबन्धन बनेको हो । दलहरूले सरकार बनाउने दाबी पेस गरेपछि प्रचण्ड आजै प्रधानमन्त्री नियुक्त हुने सम्भावना छ । प्रचण्ड तेस्रोपटक प्रधानमन्त्री बन्न लागेका हुन् ।
प्रतिनिधिसभाको दोस्रो ठूलो दल एमालेसँग ७८ सांसद छ । माओवादीको ३२, राष्ट्रिय स्वतन्त्र पार्टीका २०, राप्रपाका १४, जसपा १२, जनमत पार्टी ६ र नागरिक उन्मुक्ति पार्टीका ४ सांसद जोड्दा १६६ सांसद हुन्छ ।
