लेखा समिति सभापति पोखरेलको अभिव्यक्तिप्रति सांसद थापाको आपत्ति
सुशासन नेपाल
काठमाडौं । एनसेल बिक्री प्रकरणमा प्रतिनिधिसभाको राज्य व्यवस्था समितिमा भएको छलफलको विषयलाई लिएर सार्वजनिक लेखा समितिका सभापति ऋषिकेश पोखरेलले गम्भीर टिप्पणी गरेका छन् ।
उनले एनसेल प्रकरणमा सार्वजनिक लेखा समितिले गरिरहेको छानबिन प्रभावित बनाउन सरकारी शक्ति, सत्ता, पहुँच र साधनको प्रयोग गरी भ्रष्टाचार छोप्न खोजेको आरोप लगाएका छन् ।
उनले फेसबुकमा अगाडि लेखेका छन्, ‘आफ्नो कार्यक्षेत्र भन्दा बाहिर विभिन्न संसदीय समितिहरु मार्फत विषय बंग्याउने र जनतालाई भ्रम छर्ने कामको खेल व्यक्त गर्दछु र जनतालाई सचेत हुन अपिल गर्दछु ।’
मंगलबार राज्य व्यवस्था तथा सुशासन समितिले एनसेल बिक्रीका विषयमा प्रधानमन्त्री पुष्पकमल दाहाल प्रचण्ड र सञ्चार तथा सूचना प्रविधिमन्त्री रेखा शर्मासँग छलफल गरेको थियो । छलफलपछि समितिले एनसेल ५ वर्षपछि नेपाल सरकारकै मातहतमा आउने गरी काम गर्न सरकारलाई निर्देशन दिएको थियो ।
पोखरेलको टिप्पणीलाई लिएर राज्य व्यवस्था समितिको बैठकमा कांग्रेस महामन्त्री गगन थापाले आपत्ति जनाएका छन् । उनले एउटा संसदीय समितिका सभापतिले अर्को संसदीय समितिमाथि आरोपित गर्नु गम्भीर विषय भएको भन्दै सभामुखसँग कुरा गर्न राज्य व्यवस्था समितिका सभापति रामहरि खतिवडालाई आग्रह गरेका छन् ।
‘संसदीय समितिमा कार्यक्षेत्रका बारेमा विवाद हुन्छ, तर यो स्तरमा उत्रिएर एउटा समितिले अर्को समितिका बारेमा अर्को टिप्पणी गर्ने कुरा …यो संसदको गरिमासँग मर्यादासँग जोडिने कुरा पनि हो’, उनले भने, ‘त्यसैले माननीय सभापतिलाई यो विषयलाई हल्का रुपमा नलिन र आजै सभामुखसँग उठाउन, यसका विषयमा गम्भीरतापूर्वक कुराकानी गर्न आग्रह गर्दछु ।’
लेखा समितिको सभापतिको टिप्पणीले राज्य व्यवस्था समितिका सदस्यहरुको मान मर्यादामा पनि असर पुगेको थापाले बताए । ‘यो विषय यत्तिकै जान हुँदैन, यसका विषयमा यो यो भयो भन्ने सुन्न पाइयोस्’ थापाले सभापति खतिवडालाई भने ।
थापाको अभिव्यक्तिपछि राज्य व्यवस्था समितिका सभापति पोखरेलले यो विषयमा सभामुखसँग समन्वय गर्ने बताए ।
