यूएईमाथि नेपालको सहज जित, टी-२० शृखंला बराबरी
सुशासन नेपाल
काठमाडौँ- ‘अन्डर लाइट्स सिरिज’को दोस्रो खेलमा नेपालले यूएईलाई ८ विकेटले पराजित गरेको छ। काठमाडौँको कीर्तिपुरस्थित टीयू अन्तर्राष्ट्रिय क्रिकेट रंगशालामा भएको खेलमा ओपनर कुशल भुर्तेलको अर्धशतकको सहयोगमा नेपालले सहज जित हात पारेको हो।
नेपालले दोस्रो खेल जितेसँगै दुई खेलको ट्वान्टी-२० अन्तर्राष्ट्रिय शृङ्खला १-१ को बराबरीमा सकिएको छ। १२९ रनको सामान्य लक्ष्य नेपालले १५.५ ओभरमा २ विकेट गुमाएर पूरा गर्यो।
नेपालको जितमा कुशलले अविजित रहँदै ८४ रन प्रहार गरे। उनले ५७ बलको सामना गरेर १२ चौका र २ छक्का प्रहार गरे। कुशल मल्ल १९ रनमा आउट हुँदा कप्तान दीपेन्द्रसिंह ऐरी २३ रनमा अविजित रहे।
त्यसअघि नेपालले टस जितेर बलिङ रोजेपछि पहिले ब्याटिङ गरेको यूएईले २० ओभरमा ८ विकेट गुमाएर १२८ रन बनाएको थियो। यूएईका लागि अक्षदिप नाथले सर्वाधिक ५३ रन, मोहम्मद अफ्रानले ३२, अदिप उस्मानीले ३० रन बनाए।
मंगलबार भएको पहिलो खेलमा यूएईले नेपाललाई पराजित गरेको थियो।
