राजनीतिक स्वार्थ र दबाबमा महाभियोग लगाइएको जवराको बयान
सुशासन नेपाल
काठमाडौँ । निलम्बित प्रधानन्यायाधीश चोलेन्द्र शमशेर जबराले न्यायाधीश हरिकृष्ण कार्कीले आफ्नो स्वार्थ मिलेको मुद्दा हेर्ने गरेको बयान दिएका छन् । महाभियोग सिफारिस समितिमा बयान दिने क्रममा जबराले आफूलाई राजनीतिक स्वार्थका आधारमा महाभियोग लगाइएको भन्दै राजनीतिक दलहरूविरुद्ध प्रतिक्रिया दिएका छन् ।
यस्तै उनले सर्वोच्चका न्यायाधीशहरूमाथि एक-एक गरी आरोप लगाइरहेका छन् । महाभियोग सिफारिस समितिको बुधबारको बैठकमा बयान दिइरहेका जबराले राजनीतिक दल, सर्वोच्चका न्यायाधीशहरू, नेपाल बार एसोसिएन, मिडिया सबैलाई दबाब दिएको आरोप लगाइरहेका छन् ।
उनले न्यायाधीश कार्कीले हरेकजसो मुद्दा बहाना बनाएर नहेर्ने गरेको गर तर आफ्नो स्वार्थ मिलेको मुद्दा भने नछोड्ने गरेको बताए । उनले भने, ‘हरिकृष्ण कार्की हरेक मुद्दा हेर्न पन्छिनु हुन्छ । प्रधानमन्त्री केपी शर्मा ओलीजीको महान्यायाधीवक्ता भएको भन्नुहुन्छ । तर, आफ्नो स्वार्थ मिलेको मुद्दा हेर्नुहुन्छ ।’
सर्वोच्च अदालतमा कायममुकायम प्रधानन्यायाधीश दीपक कार्की पछिका न्यायाधीश कार्की केपी ओली पहिलोपटक प्रधानमन्त्री हुँदा महान्यायाधीवक्ता थिए ।
त्यस्तै, हाल कायममुकायम प्रधानन्यायाधीश दीपक कार्कीलाई महत्वाकांक्षा जागेकाले आफूविरुद्ध लागेको पनि जबराको बयान छ । उनलाई प्रधानन्यायाधीश बनाउने भन्ने कुरा आएपछि सर्वोच्चमा गुटबन्दी भएको जबराको भनाइ छ ।
त्यसरी गुटबन्दी गर्दा न्यायाधीश नै आन्दोलनमा उत्रिएका र उनीहरूलाई पनि कानुन लाग्नुपर्ने जबराको जिकिर थियो । ‘प्रधानन्यायाधीशविरुद्ध आन्दोलन गर्ने न्यायाधीशहरूलाई कानुन लाग्दैन ? प्रधानन्यायाधीशविरुद्ध आन्दोलन गर्दा संविधान, कानुन, आचारसंहिताले दिन्छ ?’
बारले आफूलाई राजीनामा गर्नका लागि मान्छे पठाएको पनि जबराको भनाइ छ । साथै उनले राजीनामा दिएर जान भनेर बार्गेनिङ भएको पनि आरोप लगाए ।
बयानका क्रममा एकीकृत समाजवादीकी सांसद कल्याणी खड्कासँग जबराको दोहोरो सवालजवाफ भएको थियो । खड्काले न्यायाधीशलाई बेन्चमा राख्ने र नराख्ने भन्ने प्रधानन्यायाधीशको भएको तर त्यसमा पनि प्रधानन्यायाधीशले दबाब आयो भन्दा तपाईंको क्षमतामाथि प्रश्न उठ्यो र अयोग्य भयो भन्ने कुरा आयो नि ? भनेर सोधेकी थिइन् ।
जवाफमा जबराले ‘आरोप त प्रमाणित गर्नुपर्ने होला नि’ भनेका थिए ।
खड्काले फेरि प्रश्न गरेकी थिइन्, ‘तपाईंको जवाफले नै तपाईंको कार्यक्षमतामा कमजोरी देखियो हैन र ?’ भनेर प्रश्न गरेकी थिइन् । त्यसपछि जबराले प्रधानन्यायाधीशलाई मात्रै गलत भन्न नहुने अरुलाई पनि त्यस्तो भन्नुपर्ने जवाफ दिएका थिए ।
