नेपाललाई पपुवा न्यु गिनीले दियो २०४ रनको विजयी लक्ष्य
सुशासन नेपाल
काठमाडौँ । नेपालले क्रिकेट विश्वकप लिग-२ मा सोमबार पपुवा न्यु गिनीविरुद्ध सानदार बलिङ गरेको छ । टस हारेपछि ब्याटिङमा आएको पपुवा न्यु गिनीलाई नेपालले दुबई अन्तर्राष्ट्रिय क्रिकेट रंगशालामा निर्धारित ५० ओभरमा २०३–९ को स्कोरमा रोक्यो ।
कप्तान असाद भालाले पपुवा न्यु गिनीबाट ३६ रन बनाए । उनले ५३ बल खेल्दै ४ चौका प्रहार गरे । सेसे बाउले ५१ बल खेली ३ चौका प्रहार गरि ३१, किप्लिन डोरिगाले ५९ बल खेली ४ चौका प्रहार गरी २९ रन बनाए । ओपनर टोनी उरा २ र चार्ल्स अमिनी ६ रनमा आउट भए ।
चाड सोपर ३६ रन बनाई अविजित रहे । उनले ५३ बल खेल्दै २ चौका प्रहार गरे । नोर्मन भानुआले खेलको अन्त्य तिर १५ बलमा २५ रन बनाए । उनले समान २ चौका र छक्का प्रहार गरे । गुलशन झाले नेपालबाट ३ विकेट लिए । उनले ९ ओभरमा २८ रन खर्चे । कुशल मल्लले ८ ओभरमा ४३ रन खर्चेर २ विकेट लिए । सोमपाल कामी र करण केसीको नाममा १–१ विकेट रहयो ।
नेपालले प्रतिश जिसीलाई ‘डेब्यु’ गर्ने मौका दिएको थियो । केहि महङ्गा साबित भएका उनले ६ ओभरमा ३७ रन खर्चेर एक विकेट लिए । दीपेन्द्रसिंह ऐरीले सानदार क्याच लिइ हिरी हिरीलाई १० रनमा पेभेलियन फर्काउदै प्रतिशलाई पहिलो विकेट लिन सहयोग गरे ।
घरेलु मैदानमा लिग २ को नामिबिया र च्याम्पियन स्कटल्यान्डविरुद्धको २–२ खेल गरि ४ खेल जित्दै क्लिन स्विप गरेको नेपालले त्यो फर्मलाई यूएईमा बलिङमाफर्त कायमै राखेको छ । त्यसविपरीत लिग-२ को पुछारमा रहेको पपुवा न्यु गिनीले पछिल्ला ५ खेल नै हारेको छ । टोलीले लिग २ का २८ खेलमा २ मा मात्र विजय हात पार्न सकेको छ ।
नेपाल २८ खेलको समाप्तिमा २६ अंकसहित सात राष्ट्र सहभागी लिग-२ को छैटौं स्थानमा छ ।
नेपालले बाँकी रहेको ८ मध्येको ५ खेल जितेमा शीर्ष पाँच भित्र परेर एकदिवसीय अन्तर्राष्ट्रिय मान्यतालाई कायम राख्ने छ भने ७ खेल जितेमा शीर्ष ३ राष्ट्र बन्दै जुलाईमा जिम्बावेमा हुने विश्वकप छनोटमा पुग्ने छ ।
यूएई भ्रमणमा नेपालले पपुवा न्यु गिनी र यूएईसँग २–२ खेल खेलेपछि लगत्तै काठमाडौं आएर यही दुई टोलीसँग थप २–२ खेल खेल्दै लिग २ को यात्रा टुंगाउने छ ।
