सत्ता जोगाउनकै लागि भ्रष्टाचारका मुद्दाको अनुसन्धान रोकिन्न : प्रधानमन्त्री
सुशासन नेपाल
काठमाडौँ । प्रधानमन्त्री पुष्पकमल दाहालले भ्रष्टाचारका मुद्दाको अनुसन्धानका क्रममा जो कोही दोषी भेटिए पनि कारबाही हुने बताएका छन् । उनले सत्ता जोगाउनकै लागि आफूले कोही पनि दोषी उम्किने गरी सम्झौता नगर्ने बताए । आइतबार बिहान प्रधानमन्त्रीको सरकारी निवास बालुवाटार पुगेका कांग्रेसको रुपान्तरण अभियानका नेताहरूसँगको छलफलमा प्रधानमन्त्री दाहालले आफ्नै पार्टीका नेता कार्यकर्ता परे पनि अनुसन्धानको दायरामा ल्याउने बताए ।
भेटका क्रममा रुपान्तरण अभियानका नेताहरूले सरकारले भ्रष्टाचार प्रकरणको छानबिन थालेकोप्रति प्रशंसा गर्दै ललिता निवास प्रकरण, भुटानी शरणार्थी प्रकरण र सुन प्रकरणमा संलग्नहरूलाई यो वा त्यो नभनी कारबाहीको दायरामा ल्याउनुपर्ने माग गरेका थिए । कांग्रेस नेताहरूले सरकारले प्रभावशाली नेताहरूलाई छाडेर कर्मचारी र अन्यलाई मात्रै कारबाही हुने गरी निर्देशन गरेको चर्चा भइरहेको भन्दै प्रधानमन्त्रीको ध्यानाकर्षण गराएका थिए ।
जवाफमा प्रधानमन्त्री दाहालले कुनै पनि प्रकरणमा आफ्नै पार्टीको नेता संलग्न भए पनि कारबाहीको दायरामा ल्याउने बताए ।
‘तपाईंहरूले जिम्मेवार नागरिकको रुपमा कुरा राख्नुभयो । यो ठीक छ,’ प्रधानमन्त्री दाहालले जवाफमा भनेको उद्धृत गर्दै नेता भूपेन्द्रजङ्ग शाहीले भने, ‘तर भ्रष्टाचारीलाई कारबाही गर्ने कुरामा म पहिल्यै प्रतिबद्ध छु । मेरो पद गए केही छैन, तर यो कुरामा दायाँबायाँ हुँदैन । मेरै पार्टीका नेता परे भने पनि कारबाही हुन्छ ।’
प्रधानमन्त्री दाहालले भ्रष्टाचारका प्रकरणमा सीआईबीले अनुसन्धान गरिरहेको भन्दै आफूले सीआईबीलाई जो सुकै भए पनि कारबाहीको दायरामा ल्याउन निर्देशन दिएको बताए । ‘मैले नेपाल प्रहरीलाई भनिसकेको छु । कसैलाई समाउने वा कसैलाई नसमाउने भन्ने कुरा प्रहरीकै कार्यक्षेत्रको कुरा हो,’ दाहालले अघि भनेका थिए, ‘मैले पूर्वाग्रही भएर काम गरेको छैन । जो कोही परे पनि मलाई कुनै आपत्ति छैन ।’
कांग्रेसमा नेता शेखर कोइरालानिकट नेताहरू मधु आचार्य, गुरुराज घिमिरे, भुपेन्द्रजङ्ग शाही, जगदीश्वरनरसिंह केसीलगायतले रुपान्तरण अभियान चलाइरहेका छन् । आइतबार प्रधानमन्त्रीलाई भेटेका नेताहरूले प्रधानमन्त्रीकै पदमा रहेर सामाजिक सद्भाव भड्काउने गरी अभिव्यक्ति दिन नहुनेतर्फ समेत ध्यानाकर्षण गराएका छन् ।
भेटमा नेता जगदीश्वरनरसिंह केसीले प्रधानमन्त्रीको कुर्सीमा बसेर तपाईंले सामाजिक सद्भाव बिग्रिने गरी अभिव्यक्ति दिन मिल्दैन भनेका थिए । ‘सामाजिक सद्भाव कायम गर्ने कुरामा सरकार जिम्मेवार हुन्छ । प्रधानमन्त्रीको कुर्सीमा बसेर दलीय हिसाबले अभिव्यक्ति दिन मिल्दैन,’ केसीले भनेका थिए । यसअघि नेता कोइरालाले शनिबारमात्रै धरानको घटनामा प्रधानमन्त्री पनि जिम्मेवार रहेको बताएका थिए ।
