स्थानीय निर्वाचनका लागि ९२ मुख्य निर्वाचन अधिकृत सिफारिस
सुशासन नेपाल
काठमाडौं । न्याय परिषद् सचिवालयको बैठकले स्थानीय तहको निर्वाचनका लागि मुख्य निर्वाचन अधिकृतका लागि जिल्ला न्यायाधीशहरूको नाम सिफारिस गरेको छ ।
न्याय परिषद् सचिवालयका प्रवक्ता मानबहादुर कार्कीका अनुसार ७७ जिल्लाका लागि ७७ जना जिल्ला न्यायाधीशहरूलाई मुख्य निर्वाचन अधिकृतको रुपमा सिफारिस गरिएको छ । १५ जना न्यायाधीशहरूलाई जगेडा मुख्य निर्वाचन अधिकृतको रुपमा समेत सिफारिस गरिएको छ ।
सर्वोच्च अदालतका कायममुकायम प्रधानन्यायाधीश दीपककुमार कार्कीको अध्यक्षतामा आज न्याय परिषद्सहित न्याय सेवा आयोगको समेत बैठक बसेको थियो । न्याय सेवा आयोगको बैठकबाट न्याय सेवा समूह, कानून समूह र सरकारी वकिल समूहसहित तीनवटै समूहबाट ३६७ जना उपसचिवहरूलाई निर्वाचन अधिकृतको रुपमा सिफारिस गरिएको प्रवक्ता कार्कीले बताए ।
न्याय समूहका १७९, कानून समूहका ४९ र सरकारी वकिल समूहका १४७ जना उपसचिवहरूलाई निर्वाचन अधिकृतको रुपमा आयोगले सिफारिस गरेको छ ।
