दीपेन्द्रको कप्तानीमा बरोडाविरूद्ध नेपाली टिमले फिल्डिङ गर्दै
सुशासन नेपाल
काठमाडौं । आइसिसी टी-२० विश्वकप २०२४ को तयारीका लागि भारतमा रहेको नेपाली क्रिकेट टिमले भारतको रणजी टिम बरोडाविरूद्ध पहिले फिल्डिङ गर्ने भएको छ। टस जितेको बरोडाले ब्याटिङ रोजेसँगै नेपालले पहिले फिल्डिङ गर्ने भएको हो। नेपाली टिममा चार परिवर्तन गरिएको छ। दीपेन्द्रसिंह ऐरीलाई कप्तानको जिम्मेवारी दिइएको छ। अघिल्लो खेलमा उनी टिममा थिएनन्।
खेलमा रोहित पौडेल, सोमपाल कामी, अभिनास बोहरा र आसिफ शेखलाई आराम दिइएको छ। करण केसी टिममा फर्किदा आकास चन्द र ललित राजवंशीलाई पहिलो पटक खेलाइएको छ। यसअघि नेपाली टिमले लगातार तीन खेल जितेर फाइनलमा स्थान बनाइसकेको छ। नेपालले गुजरातलाई दुवै खेलमा हराउँदा बरोडाविरुद्धको पहिलो खेल पनि जितेको थियो।
नेपालले फाइनलमा आइतबार गुजरातसँग खेल्दैछ। नेपाली टिम भारतमा तयारी गरेपछि उतैबाट एसिसी प्रिमियर कप खेल्नका लागि ओमान जाने कार्यक्रम छ। टी-२० विश्वकप आगामी जेठ दोस्रो सातादेखि अमेरिका र वेस्ट इन्डिजमा हुँदैछ।
