गल्याङ नगरपालिकाद्धारा किसानहरुका लागि कृषि उपकरण वितरण
सुशासन नेपाल
स्याङ्जा । गल्याङ नगरपालिकाले ५० प्रतिशत अनुदानमा किसानहरुका लागि कृषि उपकरण वितरण गरेको छ । गल्याङ नगरपालिका ३, गल्याङबजारमा रहेको नगर सभाहलमा शनिबार एक कार्यक्रमको आयोजना गरी कृषि उपकरण वितरण गरिएको हो ।
कार्यक्रममा गल्याङ नगरपालिका प्रमुख गुरुप्रसाद भट्टराईले सम्बृद्धिको आधार कृषि नै रहेको भन्दै कृषि सामाग्री निर्यात गर्ने उद्देश्यले कृषि उपकरण वितरणको कार्यक्रम राखिएको बताए । भट्टराईले कृषि र पशु व्यवसायलाई प्रबर्दन गर्ने, क्षमता बृद्धि गर्ने र निर्यात गर्ने उद्देश्य राखेर कृषिलाई उच्च प्राथमिकतामा राखिएको स्पष्ट पारेका छन् ।
अन्य क्षेत्रको बजेट कटौती गरेर कृषि उपकरण वितरण गरिएको भन्दै नगरप्रमुख भट्टराईले यसको अधिकतम उपयोग गर्न कृषकहरुलाई आग्रह गरेका छन् । कार्यक्रममा ५० वटा कम्माइन मिल, ३३ वटा हाते ट्याक्टर, १४ वटा च्याफ कटर र ६ वटा ब्रस कटर वितरण गरिएको छ । गल्याङ नगरपालिकाले कृषि उपकरणमा एकैपटक यति धेरै कृषि उपकरण वितरण गरेको सम्भवतः यो पहिलोपटक हो ।
