१२ वर्षपछि पूर्वमन्त्री गोविन्दराज जोशी भ्रष्टाचारी ठहर
सुशासन नेपाल
काठमाडौँ- सर्वोच्च अदालतमा मुद्दा दर्ता भएको १२ वर्षपछि पूर्वमन्त्री गोविन्दराज जोशी भ्रष्टाचारी ठहर भएका छन्। अदालतले उनीविरुद्ध ९ महिना कैद सजाय पनि सुनाएको हो। यसअघि उनलाई विशेष अदालतले दोषी ठहर गरेको थियो।
आज आइतबार सर्वोच्चका न्यायाधीशद्वय न्यायाधीश विनोद शर्मा र बालकृष्ण ढकालको इजलासले उच्चकै आदेशलाई सदर गरेको हो। अदालतले उनलाई ६९ लाख १५ हजार जरिवाना र ९ महिना कैदको सजाय सुनाइएको छ। कांग्रेसका पूर्वसहमहामन्त्रीसमेत रहेका जोशीको मुद्दा यही इजलासले ‘हेर्दाहेर्दै’मा राखेको थियो। यसअघि जेठ १ गते, ८ गते र १३ गते पनि सर्वोच्चमा सुनुवाइ भएको थियो।
अख्तियार दुरुपयोग अनुसन्धान आयोगले जोशी र उनका परिवारका सदस्यविरुद्ध भ्रष्टाचार गरी गैरकानुनी सम्पत्ति आर्जन गरेको अभियोगमा २०६० पुस १८ मा विशेष अदालतमा मुद्दा दायर गरेको थियो। उनले २ करोड १६ लाख १४ हजार ३७६ रुपैयाँ भ्रष्टाचार गरी कमाएको ठहर गरी डेढ वर्ष कैद सजाय हुने फैसला विशेषबाट भएको थियो। विशेषको फैसलाविरुद्धको मुद्दा २०६९ फागुन ६ मा सर्वोच्च पुगेको थियो। जोशी र अख्तियार दुवै पक्षले सर्वोच्चमा पुनरावेदन गरेका थिए।
