संस्कृति, पर्यटन तथा नागरिक उड्डयनमन्त्री पाण्डे हेलिकप्टर दुर्घटनास्थलमा
सुशासन नेपाल
काठमाडौँ – संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेले एयर डाइनेस्टी ९एन-एजेडी कलसाइनको हेलिकप्टर दुर्घटना भएको नुवाकोट, शिवपुरी गाउँपालिका-७ सूर्यचौर पुगेर बिहीबार बिहान निरीक्षण गरेका छन् ।
सो क्रममा मन्त्रालयका सचिव, नेपाल नागरिक उड्डयन प्राधिकरण (क्यान)का पदाधिकारी, सुरक्षा निकायका प्रतिनिधि र नुवाकोट जिल्लाका प्रमुख जिल्ला अधिकारी रहेका थिए ।
मन्त्री पाण्डेले बुधबार नै दुर्घटनास्थलमा जाने तय भएपनि हेलिकप्टर दुर्घटनाको विषयलाई लिएर मन्त्रिपरिषद्को आकस्मिक बैठक तय भएको र प्रधानमन्त्री केपी शर्मा ओलीसँग हवाई सुरक्षा लगायतका विषयमा छलफल गर्ने तय भएकाले जान सम्भव भएको थिएन ।
मन्त्री पाण्डेको सचिवालयले बुधबार राति एक प्रेस नोट जारी गर्दै यसअघि तय भएका सबै औपचारिक कार्यक्रम एक साताका लागि स्थगित गर्ने तथा आति आवश्यक बाहेकका भेटघाट बन्द गरी हवाई सुरक्षाका विषयमा चाल्नु पर्ने तत्कालीन तथा दीर्घकालीन काममा केन्द्रित हुने बताएको थियो ।
