भारतीय विदेश सचिव मिश्री काठमाडौंमा
सुशासन नेपाल
काठमाडौं – भारतका विदेशसचिव विक्रम मिश्री आइतबार दुईदिने औपचारिक नेपाल भ्रमणमा आइपुगेका छन् । परराष्ट्रसचिव सेवा लम्सालको निमन्त्रणामा उनी नेपाल आइपुगेका हुन् । लम्सालले उनलाई त्रिभुवन अन्तर्राष्ट्रिय विमानस्थलमा स्वागत गरिन् । नेपाल र भारतका परराष्ट्र मन्त्रालयले शुक्रबार एकैसाथ भ्रमण सार्वजनिक गरेका थिए ।
दुई विदेशसचिवले नेपाल–भारत सम्बन्धलाई थप सुदृढ बनाउने र पारस्परिक हितकारी सहयोगलाई अगाडि बढाउने विषयमा छलफल गर्ने परराष्ट्र मन्त्रालयले जनाएको छ। परराष्ट्रका अनुसार भारतका विदेशसचिवले नेपालका उच्चपदस्थ व्यक्तिसँग पनि भेट गर्ने कार्यक्रम छ ।
‘यो भ्रमण दुई मित्रवत् छिमेकीहरूबीचको नियमित भ्रमण आदान–प्रदानको निरन्तरता हो,’ परराष्ट्रले भनेको छ । ‘विदेशसचिवको आगामी भ्रमणले दुई देशबीचको नियमित उच्चस्तरीय आदान–प्रदानको परम्परालाई निरन्तरता दिनुका साथै छिमेकी पहिलो नीतिअन्तर्गत भारतले नेपालसँगको सम्बन्धलाई दिएको प्राथमिकतालाई प्रतिबिम्बित गर्दछ,’ भारतीय विदेश मन्त्रालयको विज्ञप्तिमा उल्लेख छ ।
नेपालमा कांग्रेस र एमाले गठबन्धन सरकार गठनपछि भारतबाट नेपाल आएका उनी उच्च कूटनीतिक अधिकारी हुन् । भारतीय विदेशसचिव नियुक्त भएपछि उनको यो दोस्रो छिमेक भ्रमण हो । उनले ४ र ५ साउनमा भुटानको भ्रमण गरेका थिए ।
भारतीय विदेशसचिवहरूले पदभार सम्हालेलगत्तै छिमेकको परिचयात्मक भ्रमण गर्ने परम्परा रहँदै आएको छ । विनयमोहन क्वात्राको अवकाशपछि मिश्रीले ३१ असारदेखि भारतीय विदेशसचिवको कार्यभार सम्हालेका थिए । भारतका नवनियुक्त विदेशसचिव मिश्री सोमबार स्वदेश फर्किनेछन् ।
