पर्यटन नीति परिवर्तन गर्ने तयारीमा छौँ : पर्यटनमन्त्री पाण्डे
सुशासन नेपाल
काठमाडौं – संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले सरकारले पर्यटन क्षेत्रमा रहेका नीतिगत समस्यालाई परिमार्जन गर्ने बताए । सोमबार ट्रेकिङ एजेन्सीज एसोसिएसन अफ नेपाल ९टान० को ४६ औँ साधारण सभामा बोल्दै मन्त्री पाण्डेले यस्तो बताएका हुन्।
सोमबार राजधानीमा आयोजित ट्रेकिङ एजेन्सिज एसोसिएसन अफ नेपाल (टान) को ४६औं वार्षिक साधारण सभामा मन्त्री पाण्डेले संस्कृति, पर्यटन तथा नागरिक उड्डयन क्षेत्रको विकास र प्रवर्द्धनका लागि निजी क्षेत्रको भूमिका अपरिहार्य रहेको बताए ।पर्यटन क्षेत्रको विकासका लागि निजी क्षेत्रसँग सहकार्य गर्न तयार रहेको बताएका छन् ।
‘मन्त्रालय निजी क्षेत्रसँग सहकार्य गरेर पर्यटन क्षेत्रको विकास गर्न तत्पर छ । पर्यटन क्षेत्रको विकासका लागि निजी क्षेत्रको भूमिका महत्वपूर्ण छ,’ मन्त्री पाण्डेले भने ।
उनले पर्यटन क्षेत्रको विकासमा नागरिक उड्डयनको क्षेत्र प्रभावकारी हुनु पर्नेमा जोड दिए । उड्डयन क्षेत्रमा विश्वास दिलाउन सके मात्र विदेशी पर्यटक सहजै भित्र्याउन सकिने उनको भनाइ छ ।
मन्त्री पाण्डेले नेपालको पर्यटनको विकासमा पर्यटन विकास नीति, संस्कृति नीति र हवाई नीति परिमार्जन गर्ने काम भइरहेको जानकारी दिए ।
हवाई क्षेत्र सुरक्षित बनाउन नियामक र सेवा प्रदायक निकायलाई छुट्टयाउने गरी ल्याएको विधेयक अर्थबाट कानुन मन्त्रालय पुगिसकेको समेत उनले बताए । वर्तमान सरकार २०८४ सम्मै जारी रहने भन्दै उनले सरकारलाई स्थायी रूपमा लिन आग्रह गरे ।
