दुई दलिय व्यवस्था बनाउनु खोज्नु नै संकटको संकेत हो : प्रचण्ड
सुशासन नेपाल
काठमाडौं – प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डले पहिलो र दोस्रो दलको सरकार बनाउनु नै संकटको संकेत भएको बताएका छन् ।
बुधबार सम्पादकहरूसँगको भेटमा उनले यस्तो बताएका हुन् । उनले भनेका छन्, ‘पहिलो र दोस्रो दलको सरकार बनाउनु नै संकटको संकेत हो । सामान्यतया संसदीय लोकतन्त्रमा यस्तो हुन्न ।’
प्रचण्ड नेतृत्वको सरकार ढालेर नेपाली कांग्रेस र नेकपा एमालेले एमाले अध्यक्ष केपी शर्मा ओलीको नेतृत्वमा सरकार बनाएका छन् । गत असार मध्यराति कांग्रेस–एमाले बीच सात बुँदे समझदारी भएको थियो । सोही समझदारीका आधारमा संघीय संसदको सबैभन्दा ठूलो दल कांग्रेस र दोस्रो ठूलो दल एमालेले सरकार बनाएका हुन् ।
कांग्रेस र एमाले बीच समझदारी भएपछि एमालेले प्रचण्ड नेतृत्वको सरकारलाई दिएको समर्थन फिर्ता लिएको थियो । त्यसपछि प्रचण्डले गत असार २८ गते प्रतिनिधि सभामा विश्वासको मत मागेका थिए । प्रचण्डले विश्वासको मत पाउन नसकेपछि उनी नेतृत्वको सरकार ढलेको थियो ।
त्यसपछि कांग्रेस र एमालेको समर्थनमा असार ३० गते ओली प्रधानमन्त्री बनेका थिए । दुई दलका बीचमा भएको समझदारी अनुसार पहिलो चरणमा एमाले अध्यक्ष ओली प्रधानमन्त्री बनेका छन् ।
दोस्रो चरणमा कांग्रेस सभापति शेरबहादुर देउवा प्रधानमन्त्री बन्ने समझदारी छ । संसदको पहिलो र दोस्रो ठूलो दलले सरकार बनाउँदा नेपालको संविधान २०७२ मा आवश्यक संशोधन गर्ने सहितका एजेण्डा अगाडि सारेका छन् । तर, के संशोधन गर्ने ठोस रुपमा प्रस्तावित भएको छैन ।
माओवादी केन्द्रका अध्यक्ष प्रचण्डले भने अहिले संविधान संशोधन नभइ कार्यान्वयन आफूहरुको प्राथमिकता रहेको बताएका छन् ।
