सत्तारुढ दलको बैठक बालुवाटारमा बस्दै
सुशासन नेपाल
काठमाडौँ – सत्ता-समीकरणमा रहेका दलहरूको बैठक शुक्रबार पनि बस्ने भएको छ । बुधबार मात्रै बालुवाटारमा जुटेका सत्तारुढ दलहरूबीच शुक्रबार पुन: छलफल हुन लागेको हो ।
प्रधानमन्त्री केपी शर्मा ओलीको सचिवालयका अनुसार शुक्रबार दिउँसो ३ बजे प्रधानमन्त्री निवास बालुवाटारमा सत्तारुढ दलको बैठक बोलाइएको छ ।
बैठकमा सरकार र मन्त्रीहरूका कामकारबाही तथा समसामयिक राजनीतिक विषयमाथि छलफल हुने बताइएको छ । प्रधानमन्त्री ओलीले बुधबार मात्र सरकारको १०० दिनको प्रगति विवरण सार्वजनिक गरेका थिए ।
एमाले अध्यक्ष ओलीलाई असार ३० गते राष्ट्रपति रामचन्द्र पौडेलले प्रधानमन्त्री नियुक्त गरेका थिए । माओवादी-रास्वपालगायतका दलको गठबन्धन टुटाएर एमालेले कांग्रेससँग मिलेर सरकार बनाएको थियो । ओलीलाई कांग्रेस, जनता समाजवादी पार्टी, लोकतान्त्रिक समाजवादी पार्टी, जनमत पार्टी, नागरिक उन्मुक्ति पार्टी र जनता समाजवादी पार्टी नेपाल समर्थन गरेका छन् । जनमत र जसपा नेपालले भने सरकारबाहिरै रहेर उनलाई समर्थन गरेका हुन् ।
