कर्मचारी नहुँदा कार्य सम्पादनमा समस्या
सुशासन नेपाल
लमजुङ, माघ १७। डिभिजन वन कार्यालय लमजुङमा कर्मचारी अभाव हुँदा कार्य सम्पादनमा समस्या भएको छ । दरबन्दीअनुसारका कर्मचारीको पदपुर्ती हुन नसक्दा कार्यालयको दैनिकीमा समस्या भएको हो ।
४५ जनाको दरबन्दी रहेको कार्यालयमा २३ जना कर्मचारी मात्र कार्यरत रहेका छन् । कार्यालयमा सबैभन्दा बढी वन रक्षकको अभाव रहेको डिभिजन वन कार्यालयका प्रमुख पूर्णेश्वर सुवेदीले बताउनुभयो । २७ जना वन रक्षकको दरबन्दी रहेको कार्यलयमा हाल १७ जना वन रक्षकको पद रिक्त रहेको उहाँ बताउनुहुन्छ । तीन जना सहायक वन अधिकृत, एक जना खरिदार र एक जना फरेस्टरसहित २२ जना कर्मचारीको पद रिक्त रहको डिभिजन वन अधिकृत सुवेदीको भनाइ छ ।
डिभिजन वन कार्यालय माताहतमा रहेका जिल्लाका सब–डिभिजन कार्यालयमा पनि कर्मचारी अभावका कारण काम गर्न समस्या भएको छ । डिभिजन वन कार्यालयका प्रमुख सुवेदीका अनुसार एक जना सहायक वन अधिकृतले तीनवटा पालिका तथा दुई सब–डिभिजन कार्यालय हेर्नुपर्ने बाध्यता छ ।
आठवटा स्थानीय तह रहेको लमजुङमा प्रत्येक पालिकामा एक सब–डिभिजन कार्यालय हुनुपर्नेमा दुई पालिका हेर्ने गरी एक सब–डिभिजन कार्यालय रहेको छ । ती कार्यालयहरुमा पनि दरबन्दीअनुसारको कर्मचारी नहुँदा अन्य कर्मचारीलाई मार पर्ने गरेको सहायक वन अधिकृत शंकर पुरी बताउनुहुन्छ । त्यसमा पनि स्रोत साधनको उचित व्यवस्था नहँुदा झनै समस्या भोग्नुपरेको उहाँको कथन छ ।
डिभिजन वन कार्यालयका सूचना अधिकारी सन्तोष खनालका अनुसार कर्मचारी करारमा राखेर काम गर्दा पनि दरबन्दीअनुसार कर्मचारी अभाव छ । जिल्लाका विभिन्न सामुदायिक वनको स्थलगत अनुगमनलगायत समग्र वनको हेरचाहमा समेत समस्या भएको उहाँको भनाइ छ ।
लमजुङमा कूल भू–भागमध्ये ६७ हजार ७ सय ३४ हेक्टर क्षेत्रफलमा वन क्षेत्रले ओगटेको छ । कूल वन क्षेत्रको करिव २८ प्रतिशत अर्थात् १८ हजार ८ सय ५० हेक्टर वन क्षेत्र एक्यापको क्षेत्रभित्र पर्ने कार्यालयका सूचना अधिकारी खनालले जानकारी दिनुभयो । कार्यालयका अनुसार जिल्लामा १ धार्मिक वनसहित ३ सय ४१ सामुदायिक वन उपभोक्त समूह र १ सय ७३ कवुलियती वन समूह रहेका छन् ।
