लोकतन्त्र एउटा राजमार्ग हो, यसमा ब्याकगियर लगाइँदैन : प्रधानमन्त्री
सुशासन नेपाल
काठमाडौँ – प्रधानमन्त्री केपी शर्मा ओलीले परिस्थिति ठीक बनाउन नसकेसम्म योजनाबद्ध ढंगले परिस्थिति परिवर्तन गर्न लाग्ने बताएका छन् । आइतबार नेपाल उद्योग परिसंघले आयोजना गरेको महिला नेतृत्व शिखर सम्मेलनलाई सम्बोधन गर्दै प्रधानमन्त्री ओलीले योजनाहीन धैर्य र सक्रियता नभई योजनाबद्ध सक्रियता, धैयपूर्वक अघि बढिरहेको आशाका साथ अघि बढ्दा र योजनासहित अघि बढ्दा असम्भव केही पनि नहुने जिकिर गरेका हुन् ।
सरकार भ्रष्टाचार नियन्त्रण र अन्त्य गर्नका लागि संकल्पका साथ अघि बढिरहेको प्रधानमन्त्री ओलीको भनाइ छ । नेपालमा अहिले झुटको खेती धेरै हुने गरेको भन्दै सही र गलत छुट्याएर अघि बढ्न जरुरी रहेको पनि उनले बताए ।
‘समाजका सम्पूर्ण सेक्सनहरू सबैलाई उठाउन सक्नुपर्दछ । करप्सन कन्ट्रोल र करप्सनको अन्त्य गर्ने संकल्पका साथ हामी अघि बढेका छौँ । मलाई विचित्र लाग्छ, नेपाल यति साह्रै झुट बोल्ने अभ्यासमा कहिल्यै पनि थिएन । यस्तो झुट बोल्ने अभ्यास चलाएको छ, गोएबल्स थिएरी भन्ने जे पनि बोलेको छ बोलेको छ । मान्छे हेर्दा भलादमी देखिन्छ, के-के बोलेको छ । यसबाट जोगिनुपर्छ, सही र गलत छुट्याएर अघि बढ्नुपर्छ,’ उनले भने ।
त्यस्तै लोकतन्त्र एउटा राजमार्ग भएको र राजमार्गमा ब्याकगियर नलगाइने पनि प्रधानमन्त्री ओलीको भनाइ छ । उनले भने, ‘डेमोक्रेसी भनेको हाइवे हो । हाइवेमा ब्याकगियर लगाइँदैन । डेमोक्रेसी इज अ हाइ वे । यसमा ब्याकगियर लगाइँदैन, अघि बढिन्छ ।’
