कांग्रेसका ६ पूर्वपदाधिकारी चाक्सबारीमा
सुशासन नेपाल
काठमाडौँ — सत्तारुढ कांग्रेसका ६ जना पूर्वपदाधिकारी चाक्सबारीमा भेला भएका छन् । पूर्वमहामन्त्रीसमेत रहेका उपप्रधानमन्त्री प्रकाशमान सिंहको निवास चाक्सीबारीमा कांग्रेसका ६ जना पूर्वपदाधिकारी भेला भएका हुन् ।
सोमबार साढे ३ बजेदेखि जारी भेलामा उपप्रधानमन्त्री सिंह, कृष्णप्रसाद सिटौला, विजयकुमार गच्छदार, गोपालमान श्रेष्ठ, डा. शशांक कोइराला र विमलेन्द्र निधी सहभागी छन् । यो बैठकमा कांग्रेसका वर्तमान प्रवक्ता प्रकाशशरण महत पनि सहभागी रहेका छन् ।
उपप्रधानमन्त्री सिंहका प्रेस संयोजक जगन्नाथ दुलालका अनुसार कांग्रेसको संगठन सुदृढीकरणदेखि मुलुकको पछिल्लो राजनीतिक अवस्थाबारे छलफलका लागि पूर्वपदाधिकारीहरू चाक्सीबारीमा भेला भएका हुन् । ‘बैठकमा पार्टीको आगामी महाधिवेशन, कांग्रेसको संगठन सुदृढीकरण, मुलुकको राष्ट्रिय राजनीति र पछिल्लो समय विकसित राजनीतिक घटनाक्रमबारे उपप्रधानमन्त्रीज्यूको निवासमा पूर्वपदाधिकारी र वर्तमान प्रवक्ताको बैठक बसेको हो,’ दुलालले भने ।
कांग्रेसका पूर्वपदाधिकारीले पछिल्लो समय आपसी भेटवार्तालाई बाक्लो बनाइरहेका छन् । उनीहरूले पार्टीको आगामी महाधिवेशन केन्द्रित भेटघाटलाई बढावा दिएका हुन् ।
