सात सय ३२ कर्मचारीलाई कारबाही सिफारिस
सुशासन नेपाल
५ माघ, काठमाडौं । राष्ट्रिय सतर्कता केन्द्रले मन्त्रालयसहितका विभिन्न कार्यालयमा गरेको अनुगमनमा तोकिएको समयमा कार्यालयमा हाजिर नहुने र तोकिएका पोसाक नलगाउने क्रम नरोकिएको जनाएको छ ।
केन्द्रका अनुसार चालू आर्थिक वर्षमा एक सय ४७ कार्यालयमा गरिएको अनुगमनमा सात सय ३२ कर्मचारी तोकिएको समयमा कार्यालयमा नआएको पाइएको छ । एक सय ५६ कर्मचारीले तोकिएको पोसाक नलगाएको फेला परेको केन्द्रका सचिव दिनेशकुमार घिमिरेले मंगलबार आयोजित पत्रकार सम्मेलनमा जानकारी दिए ।
यसरी तोकिएअनुसार काम नगर्ने निजामती कर्मचारीलाई निजामती सेवा ऐन, २०४९, स्वास्थ्य सेवाका कर्मचारीलाई स्वास्थ्य सेवा ऐन, २०५३ र करार सेवाका कर्मचारीलाई सेवा करार सम्झौताबमोजिम कारबाहीका लागि सम्बन्धित निकायमा लेखी पठाएको पनि उनले बताए । घिमिरेले गत आर्थिक वर्षबाट ल्याइएको दुई सय ५० र चालू आर्थिक वर्षमा परेको दुई सय ६३ उजुरीमध्ये दुई सय २१ अर्थात् ४३ प्रतिशत फस्र्योट भएको जानकारी दिए ।
२१ वटा अख्तियार दुरुपयोग अनुसन्धान आयोगमा पठाइएको छ भने ४७ उजुरीको विषयमा आवश्यक निर्देशन दिइएको उनको भनाइ छ । केन्द्रका अनुसार एक सय ५३ उजुरी तामेलीमा रहेको, ७० उजुरीमा छानबिन समिति गठन भएको र ७३ वटा प्रतिवेदन पेस भएको छ ।
