राष्ट्रपतिमा कांग्रेस, उपराष्ट्रपति जसपाको दाबी, अब ५ बजेको बैठकले उमेदवार तय गर्ने
सुशासन नेपाल
काठमाडौं । राष्ट्रपतिको उम्मेदवारको विषयमा छलफलमा जुटेका कांग्रेस, माओवादी, जसपा र नेकपा एकीकृत समाजवादीको बैठक निष्कर्षमा नपुगी सकिएको छ। प्रधानमन्त्रीको सरकारी निवास बालुवाटारमा बसेको अहिलेको बैठकमा दलहरूका आफ्नो आफ्नो दाबीको विषयमा छलफल भएको कांग्रेसका महामन्त्री गगनकुमार थापाले जानकारी दिए। उनका अनुसार छलफल सकरात्मक भए पनि दलभित्रै छलफल गर्न आवश्यक भएकोले साँझ बस्ने गरी बैठक सकिएको छ।
राष्ट्रपति र उपपराष्ट्रपतिबारे चार दल सहमति नजिक पुगेका छन् । उपराष्ट्रपति जनता समाजवादी पार्टी (जसपा)ले पाउने निश्चित भएको छ । राष्ट्रपतिमा नेपाली कांग्रेस र एकीकृत समाजवादीको दाबी छ । यद्यपि कांग्रेसले नै राष्ट्रपति लिने सम्भावना रहेको नेताहरु बताउँछन् ।
शुक्रबार विहान नेपाली कांग्रेस, माओवादी, जनता समाजवादी र एकीकृत समाजवादी पार्टीका शीर्ष नेताहरुको बैठक बालुवाटारमा बसेको थियो । बैठकमा एकीकृत समाजवादीले राष्ट्रपति आफ्नो दलले पाउनुपर्ने माग गरेको छ, जसलाई जसपा र माओवादीको समर्थन छ । तर माधवकुमार नेपाललाई राष्ट्रपति बनाउनुपर्ने आफूहरुको शर्त नभएको माओवादी नेताहरुले बताएका छन् ।
कांग्रेस नेताहरुले भने आफ्नो दलले राष्ट्रपति छाडेर सहमति हुन नसक्ने बताएका छन् । ‘साँझ ५ बजे हामी फेरि बस्छौं, राष्ट्रपति कांग्रेसले नै लिने पक्का जस्तै छ’ एक नेता भन्छन् । उनका अनुसार उपराष्ट्रपति भने जसपाले पाउनेछ ।
