भन्सारका कर्मचारीलाई इमान्दारिताका साथ पारदर्शी भएर काम गर्न अर्थमन्त्री महतको निर्देशन
सुशासन नेपाल
विराटनगर । अर्थमन्त्री डा. प्रकाशशरण महतले भन्सारका कर्मचारीलाई इमान्दारिताका साथ पारदर्शी भएर काम गर्न निर्देशन दिएका छन्। आज (बिहीबार) विराटनगर पुगेका उनले विराटनगर भन्सार कार्यालयको निरीक्षणपछि अनुचित काम गर्ने छुट कसैलाई नभएका हुन्।
‘तपाईंहरू राज्यको राजस्व संलन जस्तो संवेदनशील सेवामा हुनुहुन्छ। कुनै पनि तहमा माथि देखाएर आफ्नो जिम्मेवारीको दुरुपयोग गर्ने अथवा अनुचित काम गर्ने छुट कसैलाई छैन,’ उनले भने, ‘भन्सार चुहावट गर्ने प्रवृत्तिलाई हामी क्षमा दिँदैनौँ, मलाई विश्वास छ यहाँहरूले राम्रो गर्न कोसिस गरिराख्नु भएको छ र आगामी दिनमा झन् राम्रो गर्नुहुनेछ।’
मन्त्री डा. महतले कर्मचारीको मूल्यांकन कामका आधारमा हुने पनि स्पष्ट पारे। उनले भने, ‘कर्मचारीले आफ्नो जिम्मेवारी इमान्दारिताका साथ पारदर्शी रूपमा पूरा गर्नुहुनेछ।’
उनले यो आर्थिक वर्षको असारसम्ममा भन्सार असुलीको प्रतिशत निकै बढ्ने आफूले अपेक्षा गरेको पनि बताए। तर राजस्व बढाउने नाममा करदातालाई अनावश्यक दुःख नदिन पनि उनले निर्देशन दिए।
‘समग्रमा हामी पारदर्शीताका साथ काम गरौँ, सेवाग्राहीलाई सहज र सौहार्दपूर्ण वातावरण निर्माण गरौँ, नियम कानुनअनुसार काम गरौँ हामीले गर्नुपर्ने काममा सम्झौता नगरौँ,’ उनले भने।
