राष्ट्रिय सभा बैठकमा पनि एमालेको अवरोध कायमै
सुशासन नेपाल
काठमाडौँ । प्रमुख प्रतिपक्ष नेकपा (एमाले)ले राष्ट्रिय सभाको बुधबारको बैठक पनि अवरुद्ध गरेको छ । एमालेका सांसदहरूले राष्ट्रिय सभाको बैठकको कार्यसूचीमा प्रवेश गर्ने क्रममा सिटबाट उभिएर अवरुद्ध गरेका हुन् ।
राष्ट्रिय सभामा सांसदहरू सिटबाट उभिएपछि कार्यसूची अगाडि नबढाउने अभ्यास छ । एमालेले बुधबार प्रतिनिधिसभाको बैठक पनि अवरुद्ध गरेको थियो । प्रतिनिधिसभामा भने एमालेका सांसदहरू वेलमा गएर नाराबाजी गरेका थिए ।
साउन २ मा राजश्व विभागले क्विन्टल सुन बरामद गरेको विषयमा उच्चस्तरीय छानबिन समिति माग गर्दै एमालेले संसद् अवरोध गर्दै आएको छ । उसले प्रतिनिधिसभा र राष्ट्रिय सभाका बैठकहरू साउन १० यता चल्न दिएको छैन ।
राष्ट्रिय सभाको बैठकमा एमाले सांसद कुमार दसौदीले सुन तस्करी प्रकरणमा गृहमन्त्री र अर्थमन्त्री दुवै जना संलग्न रहेको आरोप लगाएका थिए । उनले भने, ‘हाम्रो संसद् अवरुद्ध पार्ने कुनै मनसाय छैन । तर, सरकार सुन तस्करी छानबिनका लागि तयार हुनुपर्छ । देश र जनताको हीतका लागि त्यो छानविन समिति आवश्यक छ । हामीलाई यो प्रकरणमा गृहमन्त्री र अर्थमन्त्रीमाथि नै गम्भीर आशंका छ । त्यसैले छानबिन समिति गठन गर्ने माग गर्नु परेको हो । तर, सरकार डराइरहेको छ ।’
एमाले सांसद विमला पौड्याल राईले प्रतिपक्षको माग पूरा गरेर संसद् चलाउनुपर्ने बताइन् । उनले भनिन्, ‘सरकारको काम सदनलाई उपयुक्त बिजनेस दिनु हो। सदनमा प्रतिपक्षको कुनै माग हुन्छ भने त्यो प्रतिपक्षसँग बसेर, कुरा सुनेर, माग पूरा गरेर सदनलाई अगाडि बढ्न दिनुपर्यो ।’ प्रतिपक्षले विश्वास गरेको छैन भने उच्चस्तरीय समिति गठन गरे सरकारलाई घाटा नहुने उनको तर्क थियो ।
राष्ट्रिय सभाको बैठक साउन २६ गते शुक्रबारसम्मका लागि स्थगित गरिएको छ ।
