कुवेतका अमिरको निधनमा आज नेपालमा शोक मनाइँदै
सुशासन नेपाल
काठमाडौँ । कुवेतका राजा नवाफ अल अहमद अल जाबेर अल सबाको निधन भएकोमा नेपाल सरकारले पनि शोक मनाउने निर्णय गरेको छ । सरकारले स्वर्गीय अमिरको निधनमा कुवेत सरकार, कुवेती जनता र स्वर्गीय अमिरको परिवारजनप्रति समवेदना व्यक्त गर्दै शोक मनाउने निर्णय गरेको हो ।
कुवेतका अमिरको सम्मानमा आज शोक मनाइने गृह मन्त्रालयले जनाएको छ। आज नेपालभरका सरकारी कार्यालय र विदेशस्थित नेपाली राजदूतावास र नियोगहरूमा राष्ट्रिय झन्डा आधा झुकाइनेछ। अमिरको ८६ वर्षको उमेरमा शनिबार निधन भएको थियो । उनको सम्मान सरकारले सोमबार शोक मनाउने र नेपालभरका सरकारी कार्यालयहरु एवम् विदेशस्थित नेपाली राजदूतावास र नियोगहरुमा राष्ट्रिय झन्डा आधा झुकाउने निर्णय गरेको हो ।
गृह मन्त्रालयका सहसचिव नारायणप्रसाद भट्टराईले आइतबार बसेको मन्त्रिपरिषद् बैठकले अमिर शेखको निधनमा शोक मनाउने निर्णय गरेको जानकारी दिए ।
