राष्ट्रनिर्माता पृथ्वीनारायण शाहप्रति राष्ट्रप्रमुखको सम्मान
सुशासन नेपाल
काठमाडौं । पुष २७ गतेलाई पृथ्वी जयन्ती र राष्ट्रिय एकता दिवसका रुपमा मनाइन्छ । आधुनिक नेपालको एकीकरण अभियानका नेतृत्वकर्ता पृथ्वीनारायण शाहको ३०२ औं जन्मजयन्ती तथा राष्ट्रिय एकता दिवस आज (शुक्रबार) विभिन्न कार्यक्रम गरी मनाइँदै छ ।
दिवसको अवसरमा शाहले राष्ट्रको एकीकरण अभियानमा पुर्याएको योगदानको स्मरण गर्दै कार्यक्रममा उनीप्रति श्रद्धासुमन अर्पण गरिन्छ । राष्ट्रनिर्माता पृथ्वीनारायण शाहलाई सम्झिने विशेष दिनका रुपमा यस दिनलाई लिने गरिन्छ । यसैबीच, राष्ट्रप्रमुखले राष्ट्रनिर्मातालाई सम्मान गरेका छन् ।
राष्ट्रपति आज (शुक्रबार) बिहान रामचन्द्र पौडेलले राष्ट्रनिर्माता पृथ्वीनारायण शाहको शालिकमा माल्यार्पण गरे । राष्ट्रपति पौडेलले देशको प्रशासनिक मुख्यालय सिंहदरबारको पश्चिम गेट अगाडिको पृथ्वीनारायण शाहको शालिकमा पुष्पगुच्छा अर्पण गर्दै सम्मान व्यक्त गरेका हुन् ।
उक्त विशेष अवसरमा नेपाली सेनाको टोलीले सलामी दिएको थियो । यस विशेष दिनको अवसरमा सरकारले आज सार्वजनिक विदा दिएको छ ।
