माओवादी केन्द्रको विधान अधिवेशन जारी
सुशासन नेपाल
काठमाडौं । नेकपा (माओवादी केन्द्र)को प्रथम विधान अधिवेशनमा समूहगत छलफलबाट सुझाव संकलन गर्ने कार्य सम्पन्न भएको छ। प्रधानमन्त्री एवं पार्टी अध्यक्ष पुष्पकमल दाहाल ‘प्रचण्ड’ ले यही फागुन १ गते प्रस्तुत गरेको विधान मस्यौदामाथि बिहीबार सात टोलीले सुझाव पेश गरेका छन्।
मंगलबारदेखि काठमाडौं कमलादीस्थित प्रज्ञा प्रतिष्ठानमा सुरू भएको अधिवेशनमा सहभागीलाई विभिन्न २० समूहमा विभाजन गरिएको थियो। बुधबार १३ समूहबाट विधान मस्यौदामाथि सुझाव प्रस्तुत भएको थियो। बिहीबार विधानमाथि सुझाव प्रस्तुत गर्दै कमला नहर्कीले पार्टीलाई श्रम र उत्पादनमा सहभागी गराउने, रूपान्तरणको नयाँ अभियान थालनी गनुपर्ने र समावेशी क्लष्टरबाट खसआर्यलाई हटाउनु पर्ने लगायतका सुझाव प्रस्तुत गरिन्।
प्रेम बयकले विधानको प्रस्तावना छोटो हुनुपर्ने एवं जनउत्तरदायी पार्टी बनाउने गरी पार्टी निर्माण गर्नुपर्ने सुझाव दिएका थिए। उनले संगठनात्मक सिद्धान्त छोटो हुनुपर्ने र मानार्थ सदस्य थप्नुपर्ने सुझाव दिए। युवराज दुलालले चुनाव चिह्न फेर्नुपर्ने, जनवादी केन्द्रीयता मात्रै राख्नु राम्रो हुने तथा विचारको स्वतन्त्रता र कामकारबाहीमा एकरूपतामा राख्नुपर्ने उनले समान पदमा दुई कार्यकाल मात्र राख्ने व्यवस्था गर्नुपर्नेमा आफ्नो समूहको जोड रहेको उल्लेख गरे।
राजकाजी गुरूङले विधानको भाषा उत्कृष्ट हुनुपर्ने उल्लेख गर्दै विधान पालना गर्नेबारे सामूहिक प्रतिबद्धता आउनुपर्ने सुझाव दिए। उनले जनप्रतिनिधि चयन गर्दा पार्टी कमिटीबाट निर्वाचित हुने प्रावधान राख्नुपर्ने बताए। रामदीप आचार्यले पार्टी प्रबलीकरण हो वा पुनर्निर्माण गर्ने हो भन्नेबारे स्पष्ट हुनुपर्ने बताए। उनले निर्वाचनका लागि ठूला लेयरहरू हटाउनुपर्ने सुझाव दिए।
कृष्णध्वज खड्काले पार्टीलाई वैकल्पिक केन्द्रीय सदस्यको व्यवस्था र केन्द्रीय समितिको विधान परिवर्तन गर्न नपाउने गरी व्यवस्था गर्नुपर्ने बताए। सुमन देवकोटाले कार्यकर्ताको सूचक निर्माण गर्नुपर्ने र सम्पत्ती सार्वजनिक गर्नुपर्ने सुझाव आफ्नो समूहको रहेको बताए।
समूहको निष्कर्ष समेटिएको सुझाव टोली नेताले प्रस्तुत गरिसकेपछि अहिले माओवादी केन्द्रको पदाधिकारी बैठक बसिरहेको छ। बैठकले सुझावअनुसार मस्यौदा परिमार्जन गरेर निर्णयार्थ प्रस्तुत गर्ने माओवादी केन्द्रले बताएकोछ।
