भरतपुर भ्रमण वर्ष : ५ लाख पर्यटक भित्र्याउने लक्ष्य
सुशासन नेपाल
चितवन । सन् २०२४ भित्र २ लाख विदेशीसहित ५ लाख पर्यटक भित्र्याउने लक्ष्यसाथ ‘भरतपुर भ्रमण वर्ष’ सुरु भएको छ । भरतपुर महानगरपालिकाले भ्रमण वर्ष अवधिभर विभिन्न ५१ वटा कार्यक्रम सञ्चालन हुने योजना बनाएको छ ।
भरतपुरको आडमा दुर्लभ वन्यजन्तु अवलोकन र पर्यापर्यटनका लागि विश्वमै चिनिएको चितवन राष्ट्रिय निकुञ्ज र हिन्दुहरूको प्रख्यात धार्मिक स्थल देवघाटधाम छ । भ्रमण वर्षका लागि महानगरले प्राकृतिक, धार्मिक, ऐतिहासिक र मानवनिर्मितसमेत गरेर भरतपुरभित्र २२ वटा पर्यटकीय गन्तव्य तय गरेको मेयर रेनु दाहालले बताइन् ।
भ्रमण वर्षको शुक्रबार नारायणगढ नारायणी नदी किनारमा प्रधानमन्त्री पुष्पकमल दाहालले औपचारिक उद्घाटन गरेका थिए । उद्घाटनमा प्रधानमन्त्रीसँगै कांग्रेस सभापति शेरबहादुर देउवा, एमाले अध्यक्ष केपी ओली, राष्ट्रिय स्वतन्त्र पार्टीका सभापति रवि लामिछाने, एकीकृत समाजवादीका अध्यक्ष माधवकुमार नेपाल, पूर्वप्रधानमन्त्री झलनाथ खनाल, मन्त्रिपरिषद्का अध्यक्ष खिलराज रेग्मीलगायत सत्तारूढ र विपक्षी दलका प्रमुख नेताहरू नै सहभागी थिए । मन्तव्यको प्रमुममा उनीहरूले भरतपुर र समग्र चितवन भ्रमण गर्न अपिल पनि गरेका छन् ।
