महामन्त्री ढकालको प्रतिवेदनले रास्वपामा तरंग
सुशासन नेपाल
काठमाडौँ । ३८ जिल्लाको यात्राबाट फर्किएपछि राष्ट्रिय स्वतन्त्र पार्टी (रास्वपा)को विषयमा महामन्त्री डा. मुकुल ढकालले तयार पारेको प्रतिवेदनले पार्टीभित्र तरंग ल्याएको छ। महामन्त्री ढकालले समीक्षा प्रतिवेदन तयार पारेर सभापति रवि लामिछानेलाई बुझाएका प्रतिवेदनले पार्टीभित्र छलफलको विषयमा बनाएको छ।
प्रतिवेदनका सन्दर्भमा छलफल गर्न रास्वपाले यही असार १९ गते केन्द्रीय समितिको बैठक बोलाएको छ। जहाँ समीक्षा प्रतिवेदनमाथि छलफल गर्ने एक मात्र कार्यसूची छ। रास्वपाका सांसद शिशिर खनाल महामन्त्रीले पार्टी सभापतिसमक्ष पेस गरेको समीक्षा प्रतिवेदनलाई गम्भीरताका साथ अध्ययन गरिने बताउँछन्।
गत वैशाख १५ गतेको इलाम क्षेत्र नम्बर २ को उपचुनावमा रास्वपाले अनपेक्षित नतिजा ल्याएको भन्दै पार्टीले महामन्त्री ढकाललाई समीक्षा यात्रामा पठाएको थियो। ढकालले जेठ ६ गतेदेखि असार ५ गतेसम्म ३९ जिल्ला भ्रमण गरेका थिए। त्यसक्रममा उनले २ हजार ७९ जनाभन्दा बढी नेता—कार्यकर्तासँग संवाद गरेको उनले बताएका छन्।
समीक्षा यात्राका क्रममा पार्टीका नेता—कार्यकर्ता, शुभेच्छुकहरूले पार्टीको जनाधार खस्कँदै गएको र यस्तै अवस्था रहे राष्ट्रिय पार्टी बन्न पनि मुस्किल हुने बताएको र त्यही आधारमा आफूले प्रतिवेदन बुझाएको महामन्त्री ढकालले बताएका छन्।
