कृषकसँग कृषि प्राविधिक कार्यक्रम : पाँच हजार कृषक परिवार लाभान्वित
सुशासन नेपाल
स्याङ्जा- गल्याङ नगरपालिकाले सञ्चालन गरेको कृषक सँग कृषि प्राविधिक कार्यक्रमबाट पाँच हजार बढि कृषक परिवार लाभान्वित भएका छन् । नगरपालिकाको ग्रामिण क्षेत्रका किसानहरुलाई लक्षित गरेर गरिएको कार्यक्रमबाट पाँच हजार एक सय १७ कृषक परिवार लाभान्वित भएका हुन् ।
गल्याङ नगरपालिकाको वडा नम्बर १ देखि ११ सम्मका वडाहरुमा सञ्चालन गरिएको कार्यक्रममा सहभागी भएर कृषकहरुले लाभ लिएका छन् । एउटा वडाको तीन देखि सात ठाउँसम्म गरी ६८ ठाउँमा कार्यक्रम सम्पन्न भएको गल्याङ नगरपालिकाले जनाएको छ ।
गल्याङ नगरपालिका प्रमुख गुरुप्रसाद भट्टराईले गएको वर्ष जस्तै यस वर्ष पनि कृषकसँग कृषि प्राविधिक कार्यक्रम सञ्चालन गरिएको बताए । उनले गएको वर्षको कार्यक्रममा तल्लो वर्गमा रहेका कृषकहरुसम्म फाइदा पुगेको पाइएपछि यस वर्ष पनि कार्यक्रमलाई निरन्तरता दिइएको बताए ।
नगरप्रमुख भट्टराईले भने – “जो गाउँघरमा १(२ वटा भैसी बाख्रा पालेर खेतबारीमा कृषि गरेर बसिरहेका साना किसानहरुलाई राज्य छ, स्थानिय सरकार छ, गुनासा समस्या राख्ने ठाउँ भन्ने जानकारी गराउन र गल्याङ नगरपालिकाले सञ्चालन गरिरहेका कृषि र पशु सम्बन्धित कार्यक्रमहरुको जानकारी गराइ जो बर्षौ देखि राज्य को सेवा सुविधाबाट टाढा रहे उनिहरुको नगरपालिकाको कृषि र पशु सम्बन्धिका कार्यक्रमहरुमा सहभागिता बढाउन कार्यक्रम गरिएको हो।”
साथै यो कार्यक्रमबाट गुजारा चलाइरहेका साना किसानहरुका लागि निकै लाभदायी हुने बताए । फर्म सञ्चालन गरेका कृषकहरु नगरपालिका सम्म आएर सुविधा लिएको भएपनि कहिल्यै नगरपालिकासम्म नआएका साना किसानहरु यो कार्यक्रमबाट लाभान्दीत भएका छन् । कार्यक्रमहरुमा कृषकहरुसग अन्तरक्रिया, छलफल गरि किसानहरुका समस्या, गुनासाहरुको समाधान पनि गरिएको छ ।
