सुदूरपश्चिम रोयल्ससँग काठमाडौँ गुर्खाज ७३ रनले पराजित
सुशासन नेपाल
काठमाडौँ- नेपाल प्रिमियर लिग (एनपीएल) अन्तर्गत बिहीबार भएको दोस्रो खेलमा काठमाडौँ गुर्खाज सुदूरपश्चिम रोयल्ससँग पराजित भएको छ।
सुदूरपश्चिम रोयल्सले प्रस्तुत गरेको १६८ रनको लक्ष्य पछ्याएको काठमाडौँ गुर्खाज ७३ रनले पराजित भएको हो। प्रतियोगितामा काठमाडौँ गुर्खाजको यो दोस्रो हार हो। यसअघि चितपन राइनोजले काठमाडौँलाई पराजित गरेको थियो।
बिहीबारको खेलमा टस हारेर ब्याटिङको निम्तो पाएको सुदूरपश्चिमले निर्धारित २० ओभरमा ६ विकेट गुमाएर १६७ रनको योगफल खडा गरेको थियो।
१६८ रनको लक्ष्य पछ्याएको काठमाडौँ गुर्खाजले १५.५ ओभरमा सबै विकेटको क्षतिमा मात्र ९४ रन बनायो। काठमाडौँ गुर्खाजका प्रारम्भिकका साथै मध्यक्रमका ब्याटरहरू सुदूरपश्चिमका बलरसामु निरीह देखिए।
काठमाडौँ गुर्खाजका लागि स्टेफेन एस्किनाजीले सर्वाधिक ३७ रन बनाए। स्टेफेनबाहेक अन्य कुनै ब्याटरले राम्रो प्रदर्शन गर्न सकेनन्। माइकेल लेभिटले ५, शंकर रानाले ३, भीम सार्कीले १०, गेरहार्ड एरास्मसले १०, सुमित महर्जनले १४ र रासिद खानले २ रन जोडे।
सुदूरपश्चिमका लागि नरेन साउदले ५ विकेट लिए। अविनास बोहराले २, ब्रान्डेन म्याकमुलेन र सैफ जैबले १–१ विकेट लिए।
यसअघि ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १६७ रन बनाएको थियो। सुदूरपश्चिमका लागि ब्रान्डन मेककुलमले सर्वाधिक ५३ रन बनाए। २८ बल सामना गरेका उनले ३ चौका र चार छक्का प्रहार गरे।
त्यस्तै कप्तान दीपेन्द्रसिंह ऐरीले आक्रमक ब्याटिङ गर्दै २५ बलमा ४३ रन जोडे। उनले तीन चौका र दुई छक्का प्रहार गरे। विनोद भण्डारीले ३५ रन बनाए।
काठमाडौँ गुखाएजका लागि रासिद खानले २, करण केसी, सहहाब आलम र गेरहार्ड एरास्मसले १–१ विकेट लिए।
