यसरी पाउन सकिन्छ निःशुल्क स्वास्थ्य सेवा ? [ क्यूआर सहित ]
सुशासन नेपाल
काठमाडौँ – स्वास्थ्य तथा जनसंख्या मन्त्रालयले नागरिकले निःशुल्क पाउने सेवाहरूबारे विवरण सार्वजनिक गरेको छ। मन्त्रालयले निःशुल्क प्राप्त गर्ने सेवा, सेवा प्राप्त गर्ने लक्षित समूह, प्राप्त गर्ने स्थान लगायत विवरण पनि सार्वजनिक गरेको छ। मन्त्रालयले नयाँ डिजाइन गरेको आफ्नो वेबसाइटमा निःशुल्क सेवा सम्बन्धी विवरणहरू र त्यसका लागि थप कागजात चाहिने वा नचाहिने जानकारी पनि विवरणमा छ।
मन्त्रालयले नागरिकलाई सरकारी स्वास्थ्य संस्थामार्फत आधारभूत उपचार निःशुल्क उपलब्ध गराइरहेको छ। यसैगरी, मिर्गौला रोग, मुटु रोग, क्यान्सर, पार्किन्सन्स, अल्जाइमर, स्पाइनल इन्जुरी, हेड इन्जुरी, सिकलसेल एनिमिया तथा जलन उपचार सेवा अन्तरगत विभिन्न उमेर समूहका बिरामीलाई विभिन्न खालका सेवा निःशुल्क दिइरहेको छ।
यसका लागि सेवा प्राप्त गर्ने स्थानको जानकारी सहित कागजात चाहिने भएमा त्यस सम्बन्धी विवरण समेत राखिएको छ। स्वास्थ्य तथा जनसंख्या मन्त्री प्रदीप पौडेलले नागरिकले प्राप्त गर्ने निःशुल्क उपचार पारदर्शी र सबैले थाहा पाउने गरी जानकारी राख्न भनेका थिए। सोही आधारमा मन्त्रालयले नयाँ डिजाइन गरिएको वेबसाइटमा विस्तृत विवरण खुलाएको हो।
‘नागरिकले प्राप्त गर्ने उपचार सेवा सबैको पहुँच र जानकारीमा होस् भन्ने हाम्रो चाहना हो,’ मन्त्री पौडेलले भने, ‘सूचनाको अभावमा कसैलाई कठिनाइ नहोस् भनेर विवरण सबैले प्राप्त गर्न सहज हुने गरी सार्वजनिक गर्ने व्यवस्था मिलाएका छौं।’
मन्त्री पौडेलले यसअघि संघीय अस्पताल तथा मेडिकल कलेजहरूलाई सेवा शुल्क सम्बन्धी विवरण वेबसाइट तथा अस्पतालमा सबैले देख्ने गरी राख्ने व्यवस्था मिलाउन भनेका थिए। सोही आधारमा अधिकांश जसोले यस्तो विवरण नागरिकले थाहा पाउने गरी राखेका छन्।
निःशुल्क सेवा सम्बन्धी सबै विवरण हेर्न यो क्यूआर स्क्यान गर्नुहोस्।
