विशेष अदालतको तथ्यांक : अख्तियारलाई दुई तिहाइ मुद्दामा सफलता
सुशासन नेपाल
काठमाडौं – अख्तियार दुरुपयोग अनुसन्धान आयोगले यो वर्ष दुई तिहाइ मुद्दामा सफलता पाएको छ । विशेष अदालतले बुधबार सार्वजनिक गरेको तथ्यांक अनुसार चालु आर्थिक वर्षमा फैसला भएकामध्ये दुई तिहाइ मुद्दामा अख्तियारको दाबी कुनै न कुनै रूपमा ठहर भएको छ ।
विशेष अदालतका उपरजिष्ट्रार कृष्णशरण लामिछानेले गत साउनदेखि असार मसान्तसम्म १३० वटा मुद्दा फैसला भएकोमा ८७ वटा मुद्दामा अख्तियारले गरेको दाबी ठहर भएको बताए । ४२ वटा मुद्दामा भने सबै आरोपितहरूले सफाइ पाए । अख्तियारले यो वर्ष मुद्दाको संख्याका आधारमा पाएको सफलता करिब ६६ दशमलब ९२ प्रतिशत हो । अख्तियारको सफलताको ठूलो हिस्सा भने घुस र नक्कली प्रमाणपत्रका मुद्दाले ओगटेको छ ।
रंगेहात घुसका ३४ वटा मुद्दा फैसला भएकोमा २८ वटामा आरोपितहरू दोषी ठहर भएका छन् । त्यस्तै ३३ जना विरुद्ध नक्कली प्रमाणपत्रको आरोपमा मुद्दा चलेकोमा २८ जना दोषी ठहर भएका छन् । ४ वटा सम्पत्ति शुद्धीकरणका मुद्दा भने अख्तिायरसँग सम्बन्धित छैनन् ।
रंगेहात घुस र प्रमाणपत्र बाहेक अरू मुद्दामा भने अख्तियारको सफलता आधाजस्तो मात्रै छ । निर्णयगत अनियमिततामा ५६ वटा मुद्दा फैसला भएकोमा २७ वटा मुद्दामा आरोपितहरू दोषी ठहर भएका छन्, २९ मुद्दामा सबै आरोपितहरूले सफाइ पाएका छन् । यो वर्ष फैसला भएका दुई वटा गैरकानुनी सम्पत्तिका मुद्दामा सबै आरोपितहरूले सफाइ पाएका छन् ।
