किताबखानाका शाखा अधिकृत प्रसाईं भ्रष्टाचार मुद्दामा दोषी ठहर
सुशासन नेपाल
काठमाडौं – विशेष अदालतले ताहाचलस्थित शिक्षक किताबखानाका शाखा अधिकृत धनेश्वर प्रसाईंलाई ३ लाख रुपैयाँ घुस लिएको भ्रष्टाचार मुद्दामा दोषी ठहर गरेको छ । घुस उठाउन सहयोगी भूमिका खेलेका क्यान्टिन सञ्चालक सुदर्शन न्यौपाने पनि दोषी ठहर भएका छन् ।
विशेष अदालतका सदस्यहरु तेजनारयाण सिंह राई र मुरारीबाबु श्रेष्ठको इजलासले उनीहरु दुबैजनालाई ६/६ महिना कैद सजाय फैसला गरेको हो । अब दुबैजनाले डेढ/डेढ लाख रुपैयाँ जरिबाना बुझाउनुपर्नेछ । उनीहरुले घुस लिएको रकम समेत जफत हुने फैसला भएको विशेष अदालतका सूचना अधिकारी यज्ञराज रेग्मीले जानकारी दिए ।
विशेष अदालतले दुबैजनाबाट ६/६ हजार रुपैयाँका दरले अपराध पीडित संरक्षण कोषमा क्षतिपूर्ति भराउनुपर्ने आदेश पनि गरेको छ ।
एक शिक्षकको पेन्सनपट्टा बनाउने क्रममा शाखा अधिकृत प्रसाईंले क्यान्टिन सञ्चालक न्यौपानेलाई प्रयोग गरेर ३ लाख रुपैयाँ घुस लिएका थिए । विशेष अदालतले धनेश्वरले घुस लिएको ठहर गर्दै न्यौपानेलाई पनि उनले घुस लिने काममा प्रयोग गरेको निष्कर्ष निकालेको छ ।
त्यो घटनामा घुस माग्न सहजीकरण गरेको आरोप खेपेकी कार्यालय सहयोगी भवानी अधिकारीलाई भने विशेष अदालतले सफाई दिएको छ । कार्यालय सहयोगी कर्मचारीले पेन्सनपट्टा बनाउने काममा कुनै हैसियत नराख्ने भन्दै विशेष अदालतले ‘उनको ओहोदासँग सम्बन्धित काम नभएको’ भन्ने आधारमा सफाई दिएको हो ।
आफूसँग शाखा अधिकृत प्रसाईंले घुस मागेको भनी शिक्षक भोजराज भट्टराईले अख्तियारमा उजुरी दिएका थिए । तर विशेष अदालतमा बकपत्र गर्दा उनले शाखा अधिकृत प्रसाईंले घुस मागेको बताए पनि कार्यालय सहयोगी अधिकारीको कुनै भूमिका नभएको भनी जिकिर गरेका थिए ।
अदालतमा गएर बयान फेरेको भन्दै अख्तियारले घुस दिएको आरोपमा शिक्षक भट्टराईमाथि पनि भ्रष्टाचारमुद्दा चलाएको थियो । विशेष अदालतले उनलाई पनि सफाई दिएको हो ।
