अख्तियारले लियो भूमि व्यवस्था मन्त्रालयका पूर्व सचिव अर्जुनप्रसाद पोखरेलसँग बयान
सुशासन नेपाल
काठमाडौँ — कास्कीको पोखरा बाटुलेचौरस्थित ‘लिची बगान’ को १ सय ३४ रोपनी जग्गा हत्याउने घटनामाथी अनुसन्धान गरिरहेको अख्तियार दुरुपयोग अनुसन्धान आयोगले भूमिव्यवस्था मन्त्रालयका पूर्व सचिव अर्जुनप्रसाद पोखरेलसँग बयान लिएको छ ।
घुस काण्डमा मुछिएका तत्कालीन संघीय मामिला मन्त्री राजकुमार गुप्ता, पूर्व भूमिव्यवस्था मन्त्री रञ्जिता श्रेष्ठ, मालपोत कार्यालय कास्कीका तत्कालीन प्रमुख मालपोत अधिकृत रामचन्द्र अधिकारी र जग्गा हत्याउने योजनका मुख्य बिचौलिया सुजन लामासँग बयान लिएको अख्तियारले यस प्रकरणमा पूर्व सचिव पोखरेलसँग मंगलबार बयान लिएको हो ।
पोखरेलले जग्गा हत्याउने खेलका संलग्न गिरोहबाट ५ लाख घुस लिएको अडियो सार्बजनिक भईसकेको छ भने गुप्ता मन्त्री भएको बेला भूमि समस्या समाधान आयोग कास्कीमा एमाले जिल्ला नेता खेमबहादुर पुनलाई अध्यक्ष बनाउन रकम लेनदनमा संलग्न भएको तथ्यसहितको अडियो बाहिरिएको थियो ।
गुप्ताले पुनलाई अध्यक्ष बनाउने प्रपञ्च फत्ते गराउन गिरोहका सुजन लामा र पूर्वमन्त्री एवं नाउपा अध्यक्ष श्रेष्ठले मन्त्री गुप्तासँग मन्त्री क्वाटरमै बसेर घुस डिल गरेका थिए । यही प्रकरणमा मुछिएपछि गुप्ताले मन्त्रीपदबाट राजीनामा दिएका थिए ।
यस प्रकरणमा हालका भूमिव्यवस्था मन्त्री बलराम अधिकारीले पनि गिरोहबाट ३२ लाख घुस बुझेको दावी गरिएको अडियो बाहिरिएपनि अधिकारी भने अझैसम्म पदमै छन् । लिचि बगानको जग्गा हत्याउने योजना र घुस प्रकरणमा संलग्नलाई कारबाहीको माग गर्दै १० असार २०८२ मै अख्तियारमा उजुरी परेको थियो ।
