कर्णालीका स्याउ बेच्न काठमाडौंमा महोत्सव
सुशासन नेपाल
काठमाडौँ — कर्णालीका उच्च पहाडी तथा हिमाली जिल्लामा फल्ने स्याउलाई ब्रान्डिङ गरी सहज रुपमा राजधानीका उपभोक्तालाई स्वाद चखाउन पहिलोपटक काठमाडौंमा स्याउ महोत्सव हुन लागेको छ ।
यही भदौ २० गतेदेखि २२ गतेसम्म तीन दिनसम्म काठमाडौंको शंखमूलस्थित कला घरमा दैनिक बिहान ११ बजेदेखि बेलुका ६ बजेसम्म स्याउन महोत्सव आयोजना हुने कला घरले जनाएको छ ।
कला घरको आयोजना र कर्णाली घरको सहआयोजनामा कर्णालीमा फल्ने स्याउ र स्याउबाट उत्पादित वस्तुहरुको प्रदर्शनी हुने भएको हो । महोत्सवमा कर्णालीमा उत्पादन हुने डेलिसियस, रोयल, गोल्डेन, गाला र फुजी लगायत दर्जन बढी प्रकारका स्याउहरु प्रदर्शनीमा राखिने छन् ।
यस्तै स्याउबाट बनेका सुकाएको चाना, साइडर, सिरका, ब्रान्डी लगायतका परिकार पनि प्रस्तुत गरिने आयोजकले जानकारी दिएको छ । स्याउ प्रदर्शनीमात्र नभइ उक्त महोत्सवमा गएर उपभोक्ताले आवश्यकताअनुसार स्याउ खरिद गरी लैजान पनि गर्न सक्नेछन् ।
कर्णालीको स्याउ स्वादका दृष्टिले यसअघि नै परिचित भए पनि यसको बजारमा खपत बढाउनका लागि पहिलोपटक औपचारिक रुपमै महोत्सवको आयोजना गर्न लागिएको हो । यस्तै कर्णालीको मौलिक संस्कृति पनि महोत्सवको मुख्य आकर्षण हुनेछ । कार्यक्रममा धामी नाच, हुड्के नाच, मागल लगायतका प्रस्तुतिहरू राखिएको छ ।
