प्रशासनको निर्णय : रात्रीकालीन व्यवसाय सुचारु हुने
सुशासन नेपाल
काठमाडौं । कोरोना भाइरस (कोभिड-१९) संक्रमणको जोखिमलाई मध्यनजर राख्दै बन्द गरिएका रात्रीकालीन व्यवसायहरु आइतबारदेखि खुला हुने भएका छन् ।
जिल्ला प्रशासन कार्यालय काठमाडौंले अघिल्लो साता गरेको निर्णय अनुसार १ फागुनदेखि रात्रिकालीन व्यवसाय खुला हुने उल्लेख छ । यसअनुसार डान्सबार, दोहोरी, नाचघर, लाउन्ज, पब, क्लबजस्ता रात्रीकालीन व्यवसाय खुला भएका हुन् ।
आइतबारदेखि हेल्थ क्लब तथा जिमखाना समेत सञ्चालनमा आएका छन् । स्वीमिङ पुल र फुटसल समेत आइतबारदेखि सञ्चालनमा आएका हुन् । रात्रीकालीन व्यवसाय बढीमा रातको १० बजेसम्म मात्र चलाउन पाइने भएको छ । यस्तो व्यवसाय सञ्चालनका दौरान जनस्वास्थ्य र सुरक्षाको मापदण्ड भने पालना गर्नुपर्ने जिल्ला प्रशासन कार्यालयको निर्णयमा उल्लेख छ ।
होटल, रेष्टुरेन्ट र क्यासिनो भने यसअघि नै चलाउन पाइने निर्णय भएको थियो । सो क्रममा समेत कारोना विरुद्ध तोकिएका स्वास्थ्य मापदण्डको भने पालना गर्नुपर्छ ।
