आठ दलीय गठबन्धनले सांसदहरुलाई अभिमुखीकरण गर्दै
सुशासन नेपाल
काठमाडौं । आठ दलीय गठबन्धनले आज संघीय संसदअन्तर्गतका दुवै सदनका सांसदहरुलाई राष्ट्रपति निर्वाचन केन्द्रित अभिमुखीकरण कार्यक्रम गर्ने भएको छ । नेपाली कांग्रेसको संयोजन र व्यवस्थापनमा आज दिउँसो १ बजे नयाँ बानेश्वर तीनकुनेस्थित रोयल ब्याङ्क्वेटमा अभिमुखीकरण कार्यक्रम हुने कांग्रेसका मुख्यसचिव कृष्णप्रसाद पौडेलले जानकारी दिए ।
कांग्रेस, नेकपा (माओवादी केन्द्र), जनता समाजवादी पार्टी (जसपा), नेकपा (एकीकृत समाजवादी), लोकतान्त्रिक समाजवादी पार्टी (लोसपा), जनमत पार्टी, राष्ट्रिय जनमोर्चा र नागरिक उन्मुक्ति पार्टीका सांसदहरूका लागि उक्त कार्यक्रम गरिने पौडेलले जनाए ।
राष्ट्रपतिको निर्वाचन यही फागुन २५ गते हुँदैछ । आठ दलको समर्थनमा कांग्रेसका वरिष्ठ नेता रामचन्द्र पौडेलले राष्ट्रपति पदमा उम्मेदवारी दिएका छन् । पौडेलको प्रतिस्पर्धीको रुपमा नेकपा (एमाले)का तर्फबाट उपाध्यक्ष सुवासचन्द्र नेम्वाङले उम्मेदवारी दिएका छन् ।
