कोशी नामकरणको विरोधमा हड्ताल, जनजीवन प्रभावित
सुशासन नेपाल
विराटनगर । प्रदेशको नामकरणपछि कोशी प्रदेशमा लगातार बन्द हड्ताल हुन थालेको छ। पछिल्लो तीन दिनभित्र दुई दिन बन्द हड्ताल हुँदा जनजीवन प्रभावित बनेको छ । पहिचान पक्षधर दल तथा संगठनहरुले फागुन १७ मा नामकरण भएयता मात्रै दुई पटक प्रदेशमा बन्द हड्ताल गरिसकेका छन्।
गएको शुक्रबार मात्रै प्रदेशमा हड्ताल गरेका पहिचान पक्षधर शक्तिहरुले आइतबार बिहानैदेखि विभिन्न ठाउँमा यातायात तथा पसलहरु बन्द गराएका छन्। लिम्बूवान संगठनका विभिन्न घटक, खम्बुवान संगठनहरुले आजको हड्ताल आह्वान गरेका हुन्। यसले प्रदेशको राजधानी विराटनगरमा सामान्य असर परे पनि झापा, इलाम, पाँचथर, ताप्लेजुङसहितका पहाडी जिल्लाहरुमा प्रभाव पारेको छ। झापाका अधिकांश निजी स्कुल बन्द छन्। इलाममा पनि शैक्षिक क्षेत्रमा असर परेको छ।
सुनसरीको धरान तथा इटहरी चोकमा बन्दकर्ता बिहानैदेखि भेला भएर यातायातका साधन रोकिरहेका छन्। कोशी प्रदेश प्रहरी प्रमुख श्यामलाल ज्ञवालीका अनुसार अहिलेसम्म कुनै अप्रिय घटना नभएको बताएका छन्। उनले सवारी साधन चलिरहेको दाबी गरेका छन्। यद्यपि मुख्य राजमार्ग क्षेत्रमा केही निजी बाहेक अधिकांश साधन ठप्पै छन्।
पहिचानका आधारमा प्रदेशको नाम राख्नुपर्ने मागसहित आन्दोलनमा उत्रेका संगठनहरुले कोशी प्रदेश नामकरण खारेज गर्नुपर्ने माग गरिरहेका छन्।
