अन्तर्राष्ट्रिय बजारमा तेल र ग्यासको मूल्य फेरि बढ्यो
सुशासन नेपाल
काठमाडौँ । भारतीय आयल कर्पोरेसन(आईओसी)ले नेपाल आयल निगमलाई ग्यास र पेट्रोलियम पदार्थको मूल्य फेरि बढाएर पठाएको छ । अन्तर्राष्ट्रिय बजारमा कच्चा तेलको मूल्य बढेको जनाउँदै आईओसीले मंगलबार मूल्य बढाएर पठाएको हो ।
‘मंगलबार पठाएको मूल्यअनुसार पेट्रोलमा प्रतिलिटर ३ रुपैयाँ ८९ पैसा, डिजेलमा ३ रुपैयाँ ८ पैसा, मट्टितेलमा १० रुपैयाँ ३० पैसा बढेर आएको छ । हवाई इन्धनमा प्रतिलिटर ३ रुपैयाँ ३२ पैसा र खाना पकाउने एलपी ग्यासमा प्रतिसिलिन्डर ९९ रुपैयाँ १७ पैसा बढेको छ,’ निगमका प्रवक्ता बिनितमणि उपाध्यायले भने, ‘मूल्य समायोजन नहुँदा निगमलाई १५ दिनमा ३ अर्ब ८ करोड ४१ लाख रुपैयाँ घाटा देखिन्छ । यो घाटा अहिलेसम्मकै उच्च हो ।’
निगमका अनुसार मूल्य समायोजन नहुँदा अहिले पेट्रोलमा प्रतिलिटर २० रुपैयाँ ५२ पैसा, डिजेलमा १६ रुपैयाँ ८ पैसा, एलपी ग्यासमा प्रतिसिलिन्डर ६ सय ६५ रुपैयाँ ३४ पैसा घाटा छ । मट्टितेल, हवाई इन्धनमा भने मूल्य बढे पनि नाफामै रहेको निगमले जनाएको छ ।
रुस युक्रेन युद्धका कारण अन्तर्राष्ट्रिय व्यापार नै उथलपुथल भएको छ । त्यसकै प्रत्यक्ष असर कच्चा तेल र ग्यासमा परेकाले नेपालमा असर देखिएको हो । केही दिनअघि ब्रेन्ट कच्चा तेलको मूल्य प्रति ब्यारेल १ सय ४ डलरसम्म पुगेको थियो । यद्यपि मंगलबार भने प्रतिब्यारेल १ सय डलर आसपासमा छ । ‘अन्तर्राष्ट्रिय बजारमा भइरहेको उतारचढावले यहाँ पनि समस्या बनाएको छ,’ उपाध्यायले भने, ‘हरेक महिनाको ८ र २३ तारिखमा आईओसीलाई रकम भुक्तानी गर्नुपर्छ । मूल्य समायोजन नहुँदा ठूलो समस्या पर्ने देखिन्छ ।’
