त्रिविमा ३ सेमेस्टरको नयाँ बीएड कार्यक्रम सुरु
सुशासन नेपाल
काठमाडौं । त्रिभुवन विश्वविद्यालयले विद्यालय शिक्षाका लागि आवश्यक दक्ष जनशक्ति उत्पादन गर्ने उद्देश्यले एक वर्षे बीएड कार्यक्रम सञ्चालनमा ल्याएको थियो । तर, प्रभावकारी नभएको भन्दै दुई वर्षअघि बन्द गर्यो । अहिले फेरि तीन सेमेस्टर अर्थात् डेढ वर्षको बनाएर सञ्चालनमा ल्याएको छ । किन फेरि सञ्चालनमा ल्यायो त्रिविले एक पटक बन्द गरिसकेको कार्यक्रम ?
शिक्षाशास्त्र बाहेक अन्य संकायका विद्यार्थीलाई शिक्षण पेसामा आकर्षित गर्न त्रिवि शिक्षा शास्त्र संकायले तीन सेमेस्टरको नयाँ बीएड कार्यक्रम सुरु गरेको छ । यसलाई शिक्षा शास्त्र संकायका २६ वटा आंगिक क्याम्पसमध्ये १३ वटामा सञ्चालन गरिनेछ भने दुई सेमेस्टर सैद्धान्तिक ज्ञान दिने र अन्तिम सेमेस्टर प्रयोगात्मक गराइने त्रिविले जनाएको छ ।
एक वर्षे बीएड कार्यक्रम प्रभावकारी नभएको निष्कर्ष निकाल्दै खारेज गरेको विश्वविद्यालयले नयाँ स्वरूपमा कार्यक्रम सञ्चालनमा ल्याएको हो । एक वर्षे बीएडमा भर्ना हुने तर कक्षामा नबसी अन्तिममा परीक्षा दिने गरेकाले विद्यार्थीमा शिक्षण पेसामा हुने ज्ञान र सीपको अभाव थियो । सेमेस्टर प्रणाली गरेपछि विद्यार्थी नियमित उपस्थित हुने र शिक्षण सिकाइका तौरतरिका, मूल्यांकन विधि, मनोवैज्ञानिक ज्ञान तथा सीप सिक्ने शिक्षक तथा विद्यार्थीहरू बताउँछन् ।
शिक्षा शास्त्र संकायमा केही वर्ष अघिसम्म डेढ लाख भन्दा बढी विद्यार्थी हुने गरेका थिए । विद्यार्थी बिदेसिने क्रम बढ्नु, शिक्षक सेवा आयोगले नियमित विज्ञापन नगर्नु र रोजगारीका अवसर नहुनुलगायतका कारण विद्यार्थी घटेका छन् । अहिले मुस्किलले ५० हजार पनि छैनन् ।
शिक्षाशास्त्रको शिक्षा कमजोर भएकै कारण शिक्षक सेवा आयोगले लिने शिक्षकको खुला विज्ञापनमा पनि धेरै फेल हुने गरेका छन् । नयाँ ढाँचामा अघि बढाइएको यो कार्यक्रमले कत्तिको दक्ष जनशक्ति उत्पादन गर्ला त ?
