प्रधानमन्त्रीको कुर्सी हल्लि सकेको छ : महामन्त्री थापा
सुशासन नेपाल
काठमाडौँ । नेपाली कांग्रेसका महामन्त्री गगनकुमार थापाले प्रधानमन्त्री पुष्पकमल दाहाल कुन बेला पदबाट हट्नुपर्ने हो भन्ने त्रासमा रहेको टिप्पणी गरेका छन् । आइतबार ललितपुरको गोदावरी नगरपालिकाको ८ औं स्थापना दिवस समारोहमा महामन्त्री थापाले युद्धस्तरमा काम गरेर मुलुकलाई समुन्नतिको बाटोमा अघि बढाउनुपर्ने देशको प्रधानमन्त्री अहिले कुन बेला पद जाने हो भनेर त्रासमा रहेको बताए ।
उनले प्रधानमन्त्रीले विश्वासको मत लिनुभन्दा पहिल्यै प्रधानमन्त्रीको कुर्सी हल्लिएको बताए । ‘प्रधानमन्त्रीको कुर्सी अहिले पहिलाभन्दा पनि कमजोर बनेको छ । बन्नुभन्दा पहिल्यै हल्लिएको छ,’ उनले भने, ‘कतिखेर म यहाँबाट धकेलिने र लड्ने हो भन्ने डरले प्रधानमन्त्रीलाई सताएको छ ।’
उनले यसपटक अबका निर्वाचनमा कसैले कसैसँग गठबन्धन नगर्ने गरी सिकाइ भएको बताएका छन् । ‘हामीले नेपालमा थुप्रै खालका अनुभवहरु बटुलेका छौँ । यसपटकको अनुभवले नेपाली कांग्रेस, नेकपा एमाले जस्ता ठूलो राजनीतिक दलहरुलाई एउटा राम्रो पाठ सिक्ने अवसर मिलेको छ,’ उनले भने, ‘मलाई लाग्छ, अबका निर्वाचनमा कसैले कसैलाई बोक्नेछैन । किनभने यसले हामीलाई कुनै प्राप्ति भएको छैन, बरु गुमेको छ ।’
महामन्त्री थापाले नेपालको राजनीति सफा नभए र राजनीतिलाई अहिलेको भन्दा शुद्ध नबनाएसम्म नेपालको समयमात्रै खेर जाने बताए ।
