संसद्मा कांग्रेसले आज पनि उठायो छानबिन समितिको माग
सुशासन नेपाल
काठमाडौं । प्रमुख प्रतिपक्षी दल कांग्रेसले सहकारी ठगीको अनुसन्धानका लागि संसदीय छानबिन समिति गठनको माग दोहोर्याएको छ ।प्रतिनिधिसभाको आजको बैठकमा पनि कांग्रेसले सहकारीको रकम अपचलनको अभियोग लागेका गृहमन्त्रीको संलग्नताबारे जाँचबुझ गर्न छानबिन समिति माग गरेको हो ।
आकस्मिक समय लिएर बोल्दै कांग्रेस सांसद ईश्वरीदेवी न्यौपानेले यस प्रकरणमा प्रधानमन्त्रीको जवाफपछि सहकारी ठगीमा गृहमन्त्रीको संलग्नताबारे निष्पक्ष अनुसन्धान हुने स्थिति नदेखिएको भन्दै छानबिन समिति नै बनाउनुपर्ने अवस्था आएको बताइन् ।
सहकारीको रकम चलाएको विषयमा प्रधानमन्त्री र गृहमन्त्रीकै भनाइ बाझिएको उनको भनाइ थियो । ‘प्रधानमन्त्रीले हिजो जवाफ दिने क्रममा रवि लामिछानेले पोखराको सहकारीबाट लिएको रकम फर्स्याेट भइसकेको पाइएको बताउनुभयो । तर, केही दिनअघि पोखरामै पत्रकार सम्मेलन गरेर रवि लामिछानेले नै आफूले कुनै सहकारीबाट पैसा नलिएको र कुनै सहकारीमा आफू सदस्य पनि नरहेको बताउनुभएको थियो,’ सांसद न्यौपानेले भनिन्, ‘प्रधानमन्त्रीले झुट बोल्नुभयो कि रवि लामिछानेले ?’
प्रधानमन्त्री र गृहमन्त्रीकै कुरा बाझिएकाले पनि निष्पक्ष छानबिनका लागि समिति बनाउनुपर्ने उनको भनाइ थियो ।
उनले सहकारी ठगीको विषयलाई कांग्रेसले राजनीतीकरण गर्न खोजेको भन्ने विषयको प्रतिवाद गर्दै कांग्रेसले हिजो सत्तामा हुँदा पनि पटकपटक यो विषय उठाएको स्मरण गराइन् ।
