सात महिनामा ४७ प्रतिशतले बढ्यो निर्यात
सुशासन नेपाल
काठमाडौँ – मुलुकको निर्यात व्यापार ४७ प्रतिशतले बढेको छ । भन्सार विभागले बिहीबार सार्वजनिक गरेको व्यापार तथ्यांकअनुसार सात महिनामा १ खर्ब २७ अर्ब २० करोड रुपैयाँको वस्तु निर्यात गरेको हो ।
यो रकम गत आर्थिक वर्षको सोही अवधिमा ४६.५० प्रतिशतले बढी रहेको विभागको तथ्यांक छ । आर्थिक वर्ष २०८०/८१ को पहिलो ७ महिनामा ८६ अर्ब ८३ करोड रुपैयाँको वस्तु निर्यात भएको थियो ।
यस्तै आयात व्यापार १० प्रतिशतले बढेको छ ।चालु आर्थिक वर्षको सात महिनामा ९ खर्ब ८८ अर्ब ५८ करोड रुपैयाँको वस्तु आयात भएको छ ।२०८०/८१ को पहिलो ६ महिनामा ८ खर्ब ९७ अर्ब ९४ करोड रुपैयाँको वस्तु आयात भएको विभागको तथ्यांक छ ।
आयात निर्यातसँगै व्यापार घाटा ६.२० प्रतिशतले बढेको छ । गत आर्थिक वर्षको पहिलो सात महिनामा मुलुकको व्यापार घाटा ८ खर्ब ११ अर्ब ११ करोड रुपैयाँ थियो । चालु आर्थिक वर्षको सोही अवधिमा व्यापार घाटा बढेर ८ खर्ब ६१ अर्ब ३८ करोड रुपैयाँ पुगेको विभागले जनाएको छ ।
